Zakir Əhmədov: "Bu tendensiya həm qeyri-neft sektorunun inkişafına, həm də ölkədə yerli istehsalın artmasına müsbət təsir edəcək"
Xarici bazarlarda "Made in Azerbaijan" brendi altında malları birləşdirən ayrı-ayrı stellajlar artıq yayılmaqdadır. Məsələ ondadır ki, bir neçə ay əvvəl Azərbaycan məhsullarının rüsumsuz ticarət mağazalarına - "Duty Free"yə çıxışının dəstəklənməsi müzakirə mövzusu idi.
Belə ki, xarici bazarlara çıxmaq üçün müxtəlif sertifikatların, patentlərin alınması, məqsədli bazarlar üçün ticarət markasının qeydiyyatı tələb olunurdu. Buna görə də mexanizmlərdən biri lazımi sertifikatlaşdırma zamanı sahibkarların dəstəklənməsinə yönəlib. İxracatçılara patent, əmtəə nişanı və ya sertifikat almaq üçün çəkilən məbləğin 50 faizi kompensasiya edilməsi bu istiqamətdə müsbət nəticələrin əldə olunmasına öz təsirini göstərib.
Məlumata görə, Avropa, Asiya, Amerikanın iri aeroportlarında "Duty Free" mağazalarında artıq Azərbaycan istehsalı olan malların sayı artır. Bir sıra müxtəlif adda məhsul "Duty Free" rəflərində rast gəlinir. Halbuki, bir neçə il bundan əvvəl Azərbaycan istehsalı olan mallar həmin mağazalarda o qədər də gözə dəymirdi.
Sözügedən məsələni dəyərləndirən ekspert Zakir Əhmədovun sözlərinə görə, bu bir sıra faktorlarla bağlıdır: "Məlumat üçün qeyd edim ki, "Duty Free" mağazaları hava limanlarında yerləşdiyi üçün bütün vergilərdən azaddır. Bir sıra ölkələrin brend məhsulları həmin mağazalarda satılır ki, bu da həmin məhsulun nisbətən ucuz satılması deməkdir. Nəticədə hava limanlarından istifadə edən xarici vətəndaşlar məhsulu daha münasib qiymətə alır. Həmçinin, həmin məhsulu almaqda maraqlı olurlar. Son dövrlər Azərbaycan istehsalı olan məhsulların "Duty Free" mağazalarında satılması istiqamətində dövlət səviyyəsində bir sıra işlər görülüb. Bunlar prosedurların sadələşdirilməsindən tutmuş, digər dəstək xarakterli işlərdir. Görünən odur ki, artıq bütün bunlar öz nəticəsini verir. Hesab edirəm ki, bu tendensiya həm Azərbaycanda qeyri-neft sektorunun inkişafına, həm də ölkədə yerli istehsalın artmasına müsbət təsir edəcək. Nəzərə almaq lazımdır ki, "Duty Free" mağazaları hər bir ölkənin brendinin tanınmasında müəyyən rol oynayır".
Vidadi ORDAHALLI
