Natiq Cəfərli: "Əmlakın satışa çıxarılması ilə bağlı qanunvericilikdə müəyyən çətinliklər var"
Bu gün insanlar maliyyə ehtiyaclarını ödəmək üçün ya yaxın bildiyi kimdənsə borc pul alır, ya da bankdan kredit götürür. Bankdan kredit götürülərkən insanlar adına olan daşınmaz əmlakı girov olaraq qoyur.
Bəllidir ki, son zamanlar ölkədə problemli kreditlərin həcmi günü-gündən artır. Kreditlər geri qaytarılmadığı üçün onların girov kimi qoyduğu daşınmaz əmlakın satışa çıxarılması artıq reallaşır. Belə ki, bankda girov olan əmlaklar satılacaq.
15 dekabr 2016-cı il tarixində Azərbaycan Banklar Assosiasiyasının (ABA) "Hüquqi məsələlər üzrə" Ekspert Qrupunun üzvləri Maliyyə Bazarlarına Nəzarət Palatasının (Palata) Hüquq və İcraat Departamentinin nümayəndələri ilə görüşüb. İclasda məhkəmə qərarlarının icrası mexanizminin və hərrac prosedurlarının sadələşdirilməsi, hərrac qaydalarının təkmilləşdirilməsi, nəticədə girov əmlakının bütün tərəflərin maraqları qorunaraq realizasiyası ilə əlaqədar veriləcək təkliflər müzakirə edilib, bu sahədə beynəlxalq təcrübənin öyrənilməsi qərara alınıb.
Bundan əlavə, banklarda idarəetmə orqanlarının tərkibi, filial və şöbələrin fəaliyyəti, bankların idarəetmə strukturu ilə əlaqədar məsələlər ətrafında fikir mübadiləsi aparılıb.
Məsələ ilə bağlı fikir bildirən iqtisadçı-ekspert Natiq Cəfərli "Bakı-Xəbər"ə açıqlamasında qeyd etdi ki, qanunvericilikdə qeyd olunur ki, kredit qaytarılmayanda girov kimi qoyulan daşınmaz əmlak banka keçir və bank onu satışa çıxararaq öz vəsaitini götürür: "Əmlakın satışa çıxarılması ilə bağlı qanunvericilikdə müəyyən çətinliklər var. İnsanın yaşamağa başqa yeri yoxdursa, ailə tərkibi böyükdürsə, himayəsində azyaşlı uşaq varsa, sosial vəziyyəti aşağıdırsa, bu kimi hallar nəzərə alınmırdı".
Həmsöhbətimiz hesab edir ki, banklar daşınmaz əmlakı girov götürərkən müxtəlif sxemlərdən istifadə edir: "Kommersiya bankları girovun qiymətini yüksək səviyyədə şişirdirdi. Və götürülən kredit daşınmaz əmlakdan qat-qat yüksək olurdu. Burada banklar çox ciddi problemlə üzləşəcək. Onlar vaxtında risq menecmentini yaxşı etmədiyinə və ya müxtəlif sövdələşmələrə getmədiyinə görə bank sektorunu ağır dönəm gözləyir. Bazar daralıb, daşınmaz əmlakın qiyməti isə düşüb. Ancaq banklar kredit verərkən məbləği daşınmaz əmlakın qiymətindən üstün yazıb. Hazırkı bazar şəraitində, qiymətlərin endiyi və satışın azaldığı ərəfədə vətəndaş girov kimi qoyduğu daşınmaz əmlakı banka verə bilər".
N.Cəfərli bildirdi ki, ipoteka və biznes kreditləri ilə bağlı götürülən kredit geri qaytarılmayıbsa, girov kimi qoyulan daşınmaz əmlak bank tərəfindən müsadirə olunaraq satışa çıxarılır.
Günel CƏLİLOVA
