Əkrəm Həsənov: "Maliyyə hesabatları ilə bağlı xüsusi bir portal yaradılsın və banklar həmin portala mütəmadi məlumat göndərsin"
Artıq banklar yeni formada hesabat verəcək. Maliyyə xidmətləri sektorunun hesabatlılığında şəffaflığın artırılması nəzərdə tutulur. Bu barədə "Azərbaycan Respublikasında maliyyə xidmətlərinin inkişafına dair Strateji Yol Xəritəsi"ndə bildirilir.
Sənəddə qeyd olunur ki, maliyyə xidmətləri sektorunun hesabatlılığında şəffaflığın artırılması imkanları mövcuddur. Sektor üzrə açıqlanan məlumatların əhatəlilik səviyyəsi və keyfiyyəti qənaətbəxş deyil.
Məlumatların açıqlanması üzrə şəffaflığın artırılması daha dəqiq və məlumat-əsaslı qərarların verilməsi imkanı yaratmaqla, bütün bazar iştirakçılarının maraqlarına xidmət edir.
Maliyyə hesabatlarının yeni formada təqdim olunması ilə bağlı fikir bildirən ekspert Əkrəm Həsənov "Bakı-Xəbər"ə açıqlamasında qeyd etdi ki, bankların maliyyə hesabatları ilə indi də tanış olmaq olar. Sadəcə, banklar bəzi detalları tam olaraq qeyd etmir: "Bildirilir ki, artıq banklar bütün məlumatları dərc edəcək. Ancaq bu da inandırıcı görünmür. Yaxşı olar ki, ətraflı məlumatı qeyd etməyən bankların cəzalandırılması bildirilsin".
Həmsöhbətimiz bildirdi ki, qanuna əsasən, banklar ictimaiyyət üçün üç aydan bir hesabat təqdim etməlidir: "O zaman sual yaranır ki, niyə üç aydan bir hesabat təqdim olunur, ancaq Palataya bir aydan bir məlumat verirlər. Elə ictimaiyyətə də hər ay məlumat versinlər. Hazırkı dövr üçün üç ay uzun müddətdir".
Ekspert təklif edir ki, maliyyə hesabatları ilə bağlı xüsusi bir portal yaradılsın: "Banklar həmin portala mütəmadi məlumat göndərsin. İctimaiyyət də həmin portal vasitəsilə bankların maliyyə durumu haqqında informasiyalı olacaq. Belə olarsa, bankların da vaxtına qənaət olar".
Ə.Həsənov onu da dilə gətirdi ki, qanunvericilikdə qeyd olunur ki, banklar öz saytlarında hesabatı təqdim etməklə yanaşı, onun dərcolunma tarixini də göstərməlidir: "Ancaq heç bir bankın saytında dərcolunma tarixi qeyd olunmur. Onu da deyim ki, bankların Palataya təqdim etdiyi hesabatla öz saytlarında göstərdiyi məlumat eyni deyil. Banklar Palataya vəziyyətinin ağır olması ilə bağlı məlumat verir, ancaq ictimaiyyəti çaşdırmaq üçün yanlış informasiya göstərir".
Günel CƏLİLOVA
