Əli Əlirzayev: "Burada kredit götürən şəxslərin deyil, bankların daha çox günahı var"
Azərbaycanda problemli kreditlərlə bağlı hər bir bank üzrə tədbirlər planı hazırlanacaq. Bu barədə Azərbaycan Prezidentinin 2016-cı il 6 dekabr tarixli Fərmanı ilə təsdiq edilmiş "Azərbaycan Respublikasında maliyyə xidmətlərinin inkişafına dair Strateji Yol Xəritəsi"ndə deyilir.
Qeyd olunur ki, Maliyyə Bazarlarına Nəzarət Palatası (MBNP) hər bir bank üzrə problemli bankların kapitallaşdırılması ilə bağlı tədbirlər planı müəyyənləşdirəcək. Plan müəyyən edilərkən potensial kapital mənbələri, qeyri-işlək aktivlərin sağlamlaşdırılması, bankların konsolidasiyası və s. imkanlar təhlil ediləcək. Tədbirlər planında bank və onun səhmdarlarının, dövlət təşkilatlarının və digər əlaqəli tərəflərin vəzifələri müəyyən ediləcək (tədbirin icrasına başlanıb). MBNP hər bir bank üzrə tədbirlər planının icrasına və nəzərdə tutulan işlərin vaxtında yerinə yetirilməsinə nəzarət məqsədilə monitorinq sistemi müəyyən edəcək.
MBNP aidiyyəti qurumlarla birlikdə problemli bankların minimum itkilərlə sağlamlaşdırılması və yaxud sistemdən kənarlaşdırılması üzrə kompleks institusional və hüquqi mexanizmlərə dair təkliflər hazırlayacaq. Bu məqsədlə "Banklar haqqında" Azərbaycan Respublikasının 2004-cü il 16 yanvar tarixli Qanununda ediləcək dəyişikliklərin layihəsi hazırlanacaq və aidiyyəti qaydada təqdim olunacaq.
"Yol xəritəsi"ndə sözügedən məsələ ilə bağlı digər işlərin də görülməsi nəzərdə tutulub. Bütövlükdə, ekspertlər buna necə yanaşır? Məsələyə münasibət bildirən iqtisadçı-alim Əli Əlirzayevin sözlərinə görə, gərək banklar problemli kreditlərin yaranmasına imkan verməyəydi: "Burada kredit götürən şəxslərin deyil, bankların daha çox günahı var. Çünki bankların funksiyaları, vəzifələri var və bütün bunlar qanunla tənzimlənir. Kredit verilərkən problem olmamalı idi. Krediti təyinatına, istifadəsinə görə vermək lazım idi. Sözügedən problemlər yaranıbsa, buna görə günah kimdədirsə, o cavab verməlidir. Nəzərə almaq lazımdır ki, kredit götürərkən girov qoyulur, kimsə zamin durur. Ödənilməyibsə, qanunauyğun addımlar atılmalıdır. Heç bir qanunsuzluq olmamalıdır. Ancaq, bununla yanaşı, insanların da mövqe və marağı təmin olunmalıdır. Banklar öhdəlik götürür və onlara cavab verməlidir. Sabah bank bağlanarsa, vəsaitin qaytarılması ilə bağlı sığorta fondu olmalıdır. Hesab edirəm ki, problemli kreditlərlə bağlı hər bir bank üzrə tədbirlər planı hazırlanması doğru yanaşmadır". Vidadi ORDAHALLI
