İldırım Qurbanov: "Bununla bağlı vergi ödəyicisinin identifikasiya nömrəsi olmalıdır"
Toylarda, şənliklərdə və digər tədbirlərdə aparıcılıq, çalğıçılıq, rəqqaslıq, aşıqlıq, məzhəkəçilik və digər oxşar fəaliyyət növü ilə məşğul olan fiziki şəxslər üçün sadələşdirilmiş vergi üzrə aylıq sabit məbləğ 30 manat müəyyən edilir.
Bununla bağlı Vergilər Məcəlləsinə yeni maddənin əlavə edilməsi nəzərdə tutulur. Əlavəyə əsasən, foto, audio-video xidmətləri (fotostudiyalar istisna olmaqla) sahəsində fəaliyyətlə məşğul olanlar üçün sadələşdirilmiş vergi üzrə aylıq sabit məbləğ 30 manat, saat, televizor, soyuducu və digər məişət cihazlarının təmiri ilə məşğul olanlar üçün 5 manat, fərdi yaşayış evlərində və mənzillərdə ev qulluqçusu, xəstələrə, qocalara və uşaqlara qulluq xidməti, dayə, fərdi sürücülük, ev təsərrüfatında təmizlik, bağban, aşpaz, gözətçi və digər analoji işlər üçün 10 manat, nəqqaşlıq emalatxanalarının fəaliyyəti üçün 20 manat nəzərdə tutulub.
Qeyd edək ki, bu fəaliyyət növləri ilə məşğul olan fiziki şəxslər üçün aylıq verginin məbləği aşağıdakı əmsallar tətbiq edilməklə müəyyən ediləcək:
- Bakı şəhərində (kənd və qəsəbələr daxil olmaqla) - 2,0;
- Gəncə, Sumqayıt və Xırdalan şəhərlərində - 1,5;
- Abşeron rayonunun qəsəbə və kəndləri (Xırdalan şəhəri istisna olmaqla), Şirvan, Mingəçevir, Naxçıvan, Lənkəran, Yevlax, Şəki və Naftalan şəhərlərində - 1,0;
- digər rayon (şəhər) və qəsəbələrdə (kəndlərdə) - 0,5.
Maraqlıdır, necə müəyyən etmək olar ki, kimsə dayəliklə, repititorluqla məşğul olur? Sözügedən mexanizm necə işləyəcək? Sözügedən məsələyə aydınlıq gətirən iqtisadçı-ekspert İldırım Qurbanovun sözlərinə görə, bununla bağlı vergi ödəyicisinin identifikasiya nömrəsi olmalıdır: "Adətən xarici təcrübədə bu modeldən istifadə edilir. Bunların gəlirləri haqqında vergi orqanlarında məlumat olmalıdır və ona nəzərən bu müəyyən edilməlidir. Birinci növbədə bu peşə ilə məşğul olanları tapıb qeydiyyata almaq lazımdır. Tutaq ki, hər hansı bir müğənni toyda iştirak edir və bunun müqabilində yaxşı qazanır. Ancaq bunun müqabilində dövlət büdcəsinə bir qəpik də xeyir vermir. Təbii ki, bu qəbuledilməzdir. Ona görə də elə bir mexanizm tapılmalıdır ki, bundan yayınma olmasın".
Vidadi ORDAHALLI
