Aydın Hüseynov: "Hansı sahədə əməyin qiymətləndirilməsi üçün "Əmək" ordeni təsis olunsa, o sahədə rekord göstərici qeydə alınacaq"
Xəbər verildiyi kimi, Azərbaycanda "Əmək" ordeni təsis olunacaq. Azərbaycanın inkişafında müstəsna əməyi olan şəxslərin mükafatlandırılması ilə bağlı ali mükafat - orden təsis olunur.
Milli Məclisin Hüquq siyasəti və dövlət quruculuğu komitəsinin iclasında "Əmək" ordeninin təsis edilməsi ilə bağlı "Azərbaycan Respublikasının orden və medallarının təsis edilməsi haqqında" Qanuna dəyişiklik müzakirəyə çıxarılıb. Təklif edilən dəyişikliyə əsasən, "Əmək" ordeni Azərbaycan vətəndaşları, əcnəbilər və vətəndaşlığı olmayan şəxslərə istənilən fəaliyyət sahəsində Azərbaycanın inkişafına və rifahının təmin olunmasına yönəlmiş müstəsna əmək nailiyyətlərinə görə veriləcək.
Həmin şəxslər sənaye, kənd təsərrüfatı, tikinti, nəqliyyat, ticarət, sənətkarlıq, xidmət və digər sahədə uzunmüddətli məhsuldar əməyə, elm, təhsil, səhiyyə, mədəniyyət, bədən tərbiyəsi, idman və digər sahələrdə fərqlənən əmək nailiyyətlərinə, kənd təsərrüfatı məhsullarının istehsalında yüksək göstəricilərə, yeni texnikanın, texnologiyanın, qabaqcıl təcrübənin, ixtiranın və səmərəliləşdirici təhsilin istehsalatda davamlı nəticəli tətbiqinə görə təltif olunacaq.
"Əmək" ordeni müvafiq icra hakimiyyəti orqanı tərəfindən veriləcək. Orden döşün sol tərəfinə, Azərbaycanın digər orden və medalları olduqda "Vətənə xidmətə görə" ordenindən sonra taxılır.
Layihə Milli Məclisin plenar iclasına tövsiyə olunub.
"Əmək" ordeninin təsis olunması ilə bağlı fikir bildirən Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Aydın Hüseynov "Bakı-Xəbər"ə açıqlamasında qeyd etdi ki, insanların hər hansı bir mütərəqqi fəaliyyəti dəyərləndirilirsə, bu müsbət qiymətləndirilməlidir: "İnsan psixologiyasında belə bir amil var ki, onun hər hansı bir fəaliyyəti tək maddi deyil, mənəvi tərəfdən də dəyərləndirilməlidir. Maddi tərəf müəyyən müddət üçün lazım olursa, mənəvi dəyərin isə vaxtı, müddəti olmur. Bu baxımdan hər bir insanın əməyinə verilən qiymət ictimailəşir. "Əmək" ordeni ilə təltif olunan şəxs haqqında ictimai fikir formalaşacaq. Çalışdığı sahədə yüksək nəticə göstərib "Əmək" ordeni ilə təltif olunan şəxs özünü daha qürurlu hiss edəcək və mənəvi cəhətdən rahatlıq tapacaq".
Millət vəkilinin fikrincə, əməyin qiymətləndirilməsi üzrə ordenlərin təsis olunması, bir növ, işçiləri həvəsləndirmək məqsədi daşıyır.
A.Hüseynovun sözlərinə görə, Azərbaycanda əvvəllər də əmək qəhrəmanları olub və onların nailiyyətləri yüksək qiymətləndirilib: "Əməyin qiymətləndirilməsi əslində yarış deməkdir. Rəqabət varsa, mütləq o sahədə uğurlu iş əldə olunacaq. Mən deyərdim ki, hansı sahədə əməyin qiymətləndirilməsi üçün "Əmək" ordeni təsis olunsa, o sahədə rekord göstərici qeydə alınacaq. İşçilər seçilmək üçün daha yaxşı nəticə göstərmək uğrunda mübarizə aparacaq".
Günel CƏLİLOVA
