Ramil Osmanlı: "Təklif məhdudlaşırsa, bazara çıxarmağa maşın olmur və belə olan halda onun qiyməti də artmalıdır"
Tez-tez mətbuatda "avtomobillərin qiyməti xeyli düşəcək", "devalvasiya maşın bazarına təsir etdi" kimi fikirlərə rast gəlirik. Devalvasiya nəticəsində dolların məzənnəsinin yüksəlməsi Azərbaycanda da avtomobillərin qiymətinə təsir etdi. Devalvasiyanın ilk vaxtlarında maşın alıcılarının sayı azaldığı üçün bu hal qiymətlərə öz təsirini göstərdi.
Ancaq indi avtomobil satışı ilə məşğul olanlar qeyd edir ki, son zamanlar qiymətlər qalxıb. Qiymət artımı özünü daha çox ikinci əl avtomobillərdə göstərir.
Mövzu barədə fikir bildirən əmlak məsələləri üzrə ekspert Ramil Osmanlı hesab edir ki, köhnə maşınların satış qiyməti yüksəlib. Buna səbəb isə idxalın və təklifin azalmasıdır: "Təbii ki, təklif məhdudlaşırsa, bazara çıxarmağa maşın olmur və belə olan halda onun qiyməti də artmalıdır. Maşınların satış qiymətində artım müxtəlif markalar üzrə dəyişir. Təqribən qiyməti 10 min manatadək olan avtonəqliyyat vasitələrində 500-1000 manat, 10-20 min manatlıq avtomobillərdə 1500-2000 manat artım var".
Həmsöhbətimizin sözlərinə görə, hazırda maşın bazarında vəziyyət çox gərgindir: "Xüsusilə də nəzərə almaq lazımdır ki, maliyyə bazarında vəziyyət dəyişkəndir. Yəni manatın dollara qarşı məzənnəsinin dəyişməsi vəziyyəti daha acınacaqlı hala salır. Belə olan vəziyyətdə maşın alış-verişi ilə məşğul olan sahibkarlar da çətinlik çəkir. Təbii ki, onlar alıcı qismində çıxış edir, əvvəl alıb, sonra satırlar. Bu sahədə vəziyyət o qədər də ürəkaçan deyil".
R.Osmanlı gələcəklə maşın bazarında vəziyyətin necə olacağı ilə bağlı proqnoz verməyin düzgün olmadığını düşünür. Onun fikrincə, öncədən verilən proqnozlar bazarı bərbad vəziyyətə qoyur: "Bu səbəbdən də proqnoz verməyin tərəfdarı deyiləm".
Günel CƏLİLOVA
