Çingiz Fərəcov: "İlin sonuna qədər ölkədə 70 min tondan artıq pambıq yığımı gözlənir, gələn il isə bu rəqəm daha artıq olacaq"
Ölkə başçısı İlham Əliyevin göstərişinə əsasən, Azərbaycanda bu ildən başlayaraq pambıq əkilən sahələr genişləndirilir. Nazirlər Kabinetinin iclasında dövlət başçısı pambıq əkininin genişləndirilməsi, bu məqsədlə stimullaşdırıcı tədbirlərin görülnməsi haqqında tapşırıqlar verib.
Keçən il Azərbaycanda cəmi 35 min ton pambıq yığıldığını xatırladan Prezident İlham Əliyev bu il məhsul istehsalının təxminən 3 dəfə artırılması haqqında tapşırıq verib. Dövlət başçısı bildirib ki, Azərbaycanda pambıqçılıq inkişaf etdirilməlidir: "Keçən il 18 min hektar əkilib. Bu il mən qarşıya vəzifə qoymuşam ki, 50 min hektar əkilsin və əkin yəqin ki, yaxın zamanlarda başlanacaq. Əgər keçən il biz 35 min ton pambıq yığa bilmişiksə, bu il 50 min hektar əkilərsə və məhsuldarlığı lap aşağı səviyyədə, 20 sentnerdən götürsək, bu, 100 min ton pambıq edəcək - keçən ildəkindən üç dəfə çox. Ancaq indi yeni texnologiyalar, o cümlədən suvarma texnologiyaları mövcuddur və biz məhsuldarlığı artırmaqla daha da böyük nəticəyə çata bilərik". Xatırladaq ki, ölkəmizdə vaxtilə il ərzində bir neçə yüz min ton pambıq yığılırdı. Bu faktı ölkə rəhbəri də öz çıxışında qeyd edib: "Vaxtilə ulu öndər Heydər Əliyevin zəhməti, səyləri nəticəsində pambığın istehsalı Azərbaycanda bir milyon tona qalxmışdı. O, 1969-cu ildə hakimiyyətə gələndə, indi mənim dəqiq yadımda deyil, təqribən 100-200 min ton pambıq istehsal olunurdu. Sonralar isə bir milyon, ildə orta hesabla 800 min, 900 min ton pambıq istehsal edilirdi".
Dövlət Statistika Komitəsinin məlumatına əsasən, bu günə olan vəziyyətə görə, ölkə üzrə 60 min tondan çox pambıq tədarük edilib. Xatırladaq ki, bu, ötən ilin eyni dövrü ilə müqayisədə 2,8 dəfə çoxdur. Ötən illə müqayisədə pambıq tədarükünün 2,8 dəfə çox olması bu sahəyə marağın artmasından xəbər verir.
Aqrar sahə üzrə ekspert Çingiz Fərəcov "Bakı-Xəbər"ə açıqlamasında qeyd etdi ki, pambıqçılıq Azərbaycan üçün yeni bir sahə deyil: "Hələ XIX əsrdən etibarən vətəndaşlarımız bu sahə ilə məşğul olur. Müstəqilliyimizin ilk illərində torpaqlar pay şəklində kəndçilərə paylanandan sonra pambıqçılığa diqqət xeyli azaldı. Lakin ölkə başçısı çıxışında dilə gətirib ki, bu il bu sahə daha da inkişaf edəcək. Artıq pambıqçılığın inkişafı üçün şərait yaradılır".
Həmsöhbətimizin sözlərinə görə, ilin sonuna qədər ölkədə 70 min tondan artıq pambıq yığımı gözlənir: "Ötən il isə 34 min ton pambıq yığılmışdı. Bu sahənin inkişafı üçün lazımi işlər görülür. Və istənilən nəticə yaxın illər ərzində əldə olunacaq".
Ekspert qeyd etdi ki, 2017-ci ilin pambıq tədarükü üçün torpaqlar şumlanır: "Aprel ayına qədər pambıq səpini yekunlaşmalıdır. Daha sonra becərmə və suvarma işlərinə start veriləcək. Ardından isə məhsul yığılacaq".
Ç.Fərəcov hesab edir ki, pambıq gəlir gətirən sahədir: "Etiraf edək ki, pambıqçılıq zəhmət tələb edən sahədir.
Nəzərə almaq lazımdır ki, 1 hektar sahədə 2 nəfər çalışır. 50 min hektarda isə 100 min insan əməklə məşğul olacaq. Bəllidir ki, kənd yerlərində yaşayan qadınların, demək olar ki, əksəriyyəti işsizdir. Ancaq indi adamlar böyük həvəs və maraqla pambıqçılıqla məşğul olacaq".
Günel CƏLİLOVA
