Sahib Məmmədov: "Bunu etməkdə məqsəd insanları yoxsulluqdan xilas etməkdir"
Əmək və Əhalinin Sosial Müdafiəsi Nazirliyinin xətti ilə özünüməşğulluq proqramı başlanıb. Qurumdan verilən məlumata əsasən, plana görə, ölkə üzrə 1500 nəfər işsiz seçiləcək və onun biznes qurmasına dəstək veriləcək. Ancaq bu o demək deyil ki, istənilən işsizə belə dəstək veriləcək. Məsələ ondadır ki, işsizlərin seçimi ilə bağlı bəzi tələblər var. Əvvəla bunlar avqust ayınadək, yəni layihə elan olunana qədər işsiz statusu alan şəxslər olmalıdır. Nazirliyin əməkdaşları həmin şəxslər barədə məlumatları - təhsili, bacarıqları, evdə əmək qabiliyyətli uşaqların sayı, sosial statusu və s. təhlil edirlər. Uyğun (yəni biznes qura bilmə baxımından) hesab edilənlər yerli məşğulluq idarələrinə dəvət edilir və burada təlimçilər onlarla söhbət apararaq seçim aparır. Nazirlikdən o da bildirilib ki, bu layihəyə qoşulmaq məcburi deyil. Cöhbət əsnasında işsiz vətəndaş biznes qura bilməyəcəyini və əvvəlki kimi müavinət almaq istədiyini söyləyərsə, o yenidən müavinət almaqda davam edəcək. Ümumilikdə 1500 nəfərin seçimi üçün əvvəlcə 3 min nəfər söhbətə cəlb olunacaq.
Onu da qeyd edək ki, birinci mərhələdə özünüməşğulluq proqramına cəlb olunan rayon sakinlərindən 171 nəfər biznes layihələrini təqdim edib. Onlardan 8 rayondan 153 fərdi biznes layihəsi maliyyələşdirilmək üçün seçilib. Hər layihə üçün orta hesabla 4 min manat ayrılması nəzərdə tutulub. Seçilən layihələrin 84 faizi heyvandarlıq sahələrinə aiddir. Müraciətlərin 5 faizi istixanaların yaradılması, 11 faizi isə müxtəlif xidmət sahələrinə - tikiş, kişi və qadın salonları, bəzək kursları və digər obyektlərin açılmasına aiddir.
Maraqlıdır, ekspertlər sözügedən layihənin əhəmiyyətini necə dəyərləndirir?
Məsələyə münasibət bildirən Əmək Hüquqlarının Müdafiəsi Liqasının rəhbəri Sahib Məmmədov buna müsbət prizmadan yanaşdı: "Bizdə 2006-cı ildən başlayaraq yoxsulluğun aradan qaldırılması ilə bağlı həyata keçirilən proqram o qədər də ciddi nəticə vermədi. Söhbət ünvanlı sosial yardımlardan gedir. Ona görə də sonrakı dövrlərdə bir sıra digər təşəbbüslər oldu. Məsələn, əvvəlki nazirin dövründə özünüdəstək proqramı olmuşdu. İndi özünüdəstək proqramı başqa bir formada reallaşdırılır. Ümumilikdə bu və buna bənzər təşəbbüslər var. Bunu etməkdə məqsəd insanları yoxsulluqdan xilas etməkdir. Onlardan biri də işsizlərə biznes kreditlərinin verilməsidir. Hesab edirəm ki, bu çox müsbət addımdır. Bu təşəbbüsə qoşulanlar yeni iş yerləri açacaq. Fikrimcə, bu layihə uğurlu olsa, fayda verəcək. Çünki Azərbaycanda bununla bağlı potensial çoxdur. İstifadə olunmamış kənd təsərrüfatı torpaqları, xidmət sahələri və s. Ancaq bu potensialdan istifadə olunmur. Bir çox hallarda ona görə ki, ya vəsait yoxdur, ya da kredit yükü ağırdır. Bu cür sosial kreditləşmə ilə müəyyən nailiyyətlər əldə etmək olar".
Vidadi ORDAHALLI
