Dövlət Məmmədov: "Uzun illərdir istismar olunan su anbarlarında müəyyən problemlər əmələ gəlib"
Məlum olduğu kimi, Prezident İlham Əliyev su anbarlarının istismar vəziyyətinin yaxşılaşdırılması ilə əlaqədar Dövlət Komissiyasının yaradılması haqqında Sərəncam imzalayıb.
Sərəncamda deyilir ki, ölkənin su, ərzaq və enerji təhlükəsizliyinin təmin edilməsində mühüm rol oynayan, dövlət əhəmiyyətli Şəmkir, Yenikənd, Mingəçevir, Varvara, Ceyranbatan və digər su anbarları uzun müddət istismar olunduğundan, bu hidroqovşaqlarda mövcud problemlərin öyrənilməsi və qiymətləndirilməsi, baş verə biləcək texnogen proseslərin proqnozlaşdırılması zərurəti yaranıb.
Sərəncam qeyd edilən su anbarlarının istismar vəziyyətinin yaxşılaşdırılması məqsədilə imzalanıb. Şəmkir, Yenikənd, Mingəçevir, Varvara, Ceyranbatan və digər su anbarlarının istismar vəziyyətinin öyrənilməsi ilə əlaqədar yaradılan komissiya on üzvdən ibarətdir. Bir sıra rəsmi şəxslər komissiyanın üzvüdür.
Dövlət Komissiyasına sərəncamda göstərilən su anbarlarının hidrotexniki qurğularında və su mühafizə zonasında mövcud problemləri araşdırmaq, su anbarlarının bəndlərinə təhlükə yaradan amilləri müəyyənləşdirmək, texniki təhlükəsizliyini təmin edən tədbirlərə dair təkliflərini iki ay müddətində hazırlayıb Azərbaycan Prezidentinə təqdim etmək tapşırılıb.
Ümümilikdə sözügedən su anbarlarının istismar vəziyyətinin yaxşılaşdırılması ilə bağlı görülən tədbirlər aqrar sektorun inkişafı üçün nə vəd edir? Sözügedən məsələ ilə bağlı fikirlərini "Bakı-Xəbər"lə bölüşən "Su İstehsalçıları" İctimai Birliyinin rəhbəri Dövlət Məmmədovun sözlərinə görə, prinsipcə, belə bir qərarın verilməsi müsbət haldır: "Ona görə ki, aqrar sektorun inkişafında suvarma vacib rola malik olan sahələrdən biridir. Çünki bir sıra hallarda əkin sahələri suvarmadan əziyyət çəkir. Bunun səbəbi onunla bağlıdır ki, uzun illərdir istismar olunan su anbarlarında müəyyən problemlər əmələ gəlib. Bu da, istər-istəməz, əkin sahələrinin vaxtında və davamlı su ilə təminatını çətinləşdirir. Ona görə də su anbarlarının istismar vəziyyəti yaxşılaşdırılsa, əlbəttə ki, bu, aqrar sektorun inkişafına müsbət təsir göstərəcək. O şərtlə ki, sərəncamdan irəli gələn vəzifələr yerinə yetirilsin. Deməyim odur ki, təkcə sərəncamla iş bitmir. Sərəncamdan irəli gələn vəzifələrin yerinə yetirilməsi də vacib şərtlərdən biridir". Vidadi ORDAHALLI
