Oqtay Haqverdiyev: "Neftin qiymətinin aşağı düşməsi ölkəyə daxil olan pul kütləsinə öz təsirini göstərir"
Azərbaycan Mərkəzi Bankının cari ilin yanvar-sentyabr ayları üzrə pul siyasəti icmalında ölkəyə daxil olan pul kütləsinin həcmi azalıb. İlkin rəqəmlərə əsasən, 2016-cı ilin 9 ayında Azərbaycana daxil olan pul baratları 585,5 milyon dollar təşkil edib.
Hesabata əsasən, pul baratlarının həcmi 35 faiz azalıb. 2015-ci ilin yanvar-sentyabr aylarında bu göstərici 897 milyon dollar təşkil edib. 2014-cü ilin analoji dövründə isə bu rəqəm 1,16 milyard dollar olub.
2016-cı ilin 9 ayında iqtisadi tərəfdaş ölkələrində yaranmış vəziyyət qeyri-neft ixracı ilə yanaşı, ölkəyə daxil olan pul baratlarının dinamikasına da təsir edib.
Hesabat dövründə də ölkədə xarici müəssisə və təşkilatlar tərəfindən əsas kapitala investisiya qoyuluşları davam edib. Dövlət Statistika Komitəsinin məlumatına görə, xarici mənbələrdən əsas kapitala yönəldilmiş investisiyaların həcmi 2016-cı ilin 9 ayında 6,3 milyard manat ekvivalentində olub ki, bu da əsas kapitala yönəldilmiş ümumi investisiyaların 60,9 %-ni təşkil edir. Əsas kapitala yönəldilmiş xarici investisiyaların artım tempi 25,8 % olub.
Xarici ölkələr və beynəlxalq təşkilatlar tərəfindən əsas kapitala yönəldilmiş vəsaitin çox hissəsi Böyük Britaniya, Türkiyə, Rusiya, İran, ABŞ, Yaponiya, Malaziya və İsveçrənin sərmayədarlarına məxsus olub.
Ölkəyə daxil olan pul kütləsinin həcminin azalması ilə bağlı fikir bildirən Oqtay Haqverdiyev "Bakı-Xəbər"ə açıqlamasında qeyd etdi ki, bu, dünyada baş verən maliyyə və iqtisadi böhranla bağlıdır: "Daxil olan pul kütləsinin həcminin azalması gözlənilən idi. Bunun əsas səbəbi neftin satış qiymətinin aşağı düşməsidir. Bəllidir ki, ixracın 92 faizi neft və qaz idi. Amma bu gün həmin rəqəm 82 faizə düşüb. Bu olay nəticədə daxil olan pul kütləsinə təsir edir".
Həmsöhbətimizin sözlərinə görə, ölkədə bəzi xarici şirkətlər fəaliyyətini dondurub: "Elə şirkətlər var idi ki, onların Bakıda nümayəndəliyi var idi. Ancaq əsas iş xaricdə görülürdü və oradan da bizə müəyyən məbləğdə pul göndərilirdi. Dünyada baş verən iqtisadi böhran həmin şirkətlərə təsir göstərdiyi üçün onların fəaliyyəti dayanıb və nəticədə ölkəyə daxil olan pul kütləsi azalıb".
Günel CƏLİLOVA
