Vüqar Bayramov: "Çünki torpaq fondu kiçik olduğuna görə..."
"Mənim göstərişimlə qısa müddət ərzində 200 min hektardan çox torpaq sahəsi o torpaqları qanunsuz şəkildə zəbt edənlərin əlindən alınıb və insanlara verilib. Əgər kimsə boş torpağı zəbt edibsə, bilsin ki, əlindən alınacaq. Əgər əlindən alınmağını istəmirsə, əkib-becərsin, həm özü pul qazansın, həm də ki, insanlara xeyir versin. Ancaq o torpaqları zəbt edənlər, görünür, maraqlı deyillər ki, orada nəsə iş görsünlər. Görünür, onların pulu o qədərdir ki, o torpaqlardan pul qazanmaq fikrində deyillər. Ona görə bu proses davam edəcək".
Bunu Prezident İlham Əliyev noyabrın 12-də Füzuli rayon ictimaiyyətinin nümayəndələri və məcburi köçkünlərlə görüşündə deyib. Dövlət başçısı qanunsuz zəbt edilmiş 200 min hektar torpağın birinci mərhələdə insanlara qaytarıldığını qeyd edib: "Çünki bu gün kənd təsərrüfatında gedən proseslər artıq öz bəhrəsini verir. Biz pambıqçılığı bərpa etmişik".
Dövlət başçısı onu da qeyd edib ki, gələcəkdə hər bir rayon özü-özünü təmin etməlidir: "Gələcəkdə bizim planlarımız ondan ibarətdir ki, hər bir rayon özünü təmin edə bilsin. Yəni bu gün rayonların bir çoxu dotasiya ilə yaşayır. İndi Azərbaycan dövlətinin gücü, maddi imkanları var, biz bunu edirik və edəcəyik. Ancaq hər bir rayon çalışmalıdır ki, öz hesabına yaşasın. Buna imkan var".
Məlumat üçün onu da qeyd edək ki, istifadəsiz torpaqlarla bağlı Vergi Məcəlləsində də bəzi dəyişikliklər edilib. Bu Məcəllənin 206.1-1-ci maddəsində nəzərdə tutulan hallar istisna olmaqla, kənd təsərrüfatı torpaqları üzrə torpaq vergisinin dərəcəsi torpaq sahəsinin hər 100 kvadratmetrinə görə 10 manat müəyyən edilir. Qanun layihəsi səsverməyə çıxarılaraq qəbul edilib. Qanun qüvvəyə mindikdən sonra əkilməyən 1 ha (10 000 kv.m.) torpağa görə 1000 manat vergi ödənilməlidir. Onu da vurğulayaq ki, istifadəsiz torpaqlarla bağlı cərimələnmə iri sahələrə aid olacaq.
Bütün hallarda, Prezidentin istifadəsiz torpaqlarla bağlı son xəbərdarlığını ekspertlər necə dəyərləndirir?
Sözügedən məsələni dəyərləndirən iqtisadçı-ekspert Vüqar Bayramov Prezidentin bununla bağlı səsləndirdiyi fikirləri dəstəkləyir. Onun fikrincə, həmin torpaqlar istifadəyə cəlb olunmalıdır: "Burada əsas məqsəd istifadə olunmayan torpaqların kənd təsərrüfatında əkin məqsədilə istifadəsinin təmin edilməsidir. Söhbət hasarlanmış, kənd təsərrüfatı təyinatından yayındırılan, amma kənd təsərrüfatı üçün yararlı olan torpaqların istifadə edilməməsinə görə cərimələnmədən gedir. Təbii ki, torpaqdan isifadə olunmursa, o zaman qanuna müvafiq olaraq müəyyən tədbirlər görülməlidir. Onu da qeyd edim ki, istifadə olunmayan torpaqlara görə cərimələrin tətbiq olunması tək bizdə deyil. Məsələn, Rusiyada da istifadə olunmayan torpaqlara görə cərimələr tətbiq edilir. Çünki torpaq fondu kiçik olduğuna görə istifadəyə verilən torpaqların həcminin artırılması olduqca vacibdir. Burada istifadəsiz qalan torpaq sahibləri də vergi ödəyicisidir. Digər tərəfdən də cərimə tətbiq olunur. Görülən tədbirlər istifadə edilməyən torpaqlarda əkin işləri aparılmasına imkan yaradacaq. Çünki cərimlərin məbləği kifayət qədər yüksəkdir. Ona görə də bu addım həmin torpaqların istifadəsini təmin etməyə imkan verəcək".
Vidadi ORDAHALLI
