Çingiz Fərəcov: "İnkişaf hektarı artırmaq yox, keyfiyyəti artırmaqla olmalıdır"
"Bu gün artıq Azərbaycanda 30-dan çox iri fermer təsərrüfatı var və ölkəmizin ərzaq təhlükəsizliyinin təmin edilməsində bu təsərrüfatlar çox böyük rol oynayır. Mən bu gün vəziyyətlə tanış olarkən gördüm ki, bütün işlər yaxşı səviyyədə qurulub, böyük əkin sahələri artıq istifadədədir".
Bunu Prezident İlham Əliyev Beyləqan rayon ictimaiyyətinin nümayəndələri ilə görüşündə deyib. Dövlət başçısı onu da qeyd edib ki, Azərbaycan öz ərzaq təhlükəsizliyini təmin edəcək: "Bu gün hələ ki, biz buğda ilə özümüzü tam təmin edə bilmirik. Bunun obyektiv səbəbləri var. Ancaq bu hədəfə yaxınlaşırıq. Bununla bərabər, bizim taxılçılıqda böyük ixrac potensialımız yaranmalıdır. Necə ki, biz meyvə-tərəvəz məhsullarını, digər məhsulları ixrac edirik, gələcəkdə taxılçılıq məhsullarını da ixrac etməliyik. Ancaq, əlbəttə, ilk növbədə daxili tələbatımızı ödəməliyik. Bu gün deyə bilərəm ki, bütün ölkələr ərzaq təhlükəsizliyi ilə bağlı müəyyən narahatlıqlar yaşayırlar. Çünki dünyada əhali artdıqca, tələbat da artır, torpaq sahəsi isə artmır. Əlbəttə ki, bu artan tələbatı ödəmək üçün çox ciddi addımlar atılmalıdır. Bizim o qədər də böyük torpaq sahəmiz yoxdur. Ona görə biz hər qarış torpaqdan səmərəli istifadə etməliyik. Bir qarış torpaq da boş qalmamalıdır".
Ölkənin taxıla olan tələbatının yerli istehsal hesabına ödənilməsi milyonlarla valyuta ehtiyatının xaricə axınının qarşısını alacaq. Bununla yanaşı, əlavə istehsal olunan məhsul ixrac olunacaq. Bütövlükdə Azərbaycanın taxıl ixracatçısına çevrilməsi mümkündürmü?
Sözügedən məsələni dəyərləndirən kənd təsərrüfatı üzrə mütəxəssis Çingiz Fərəcovun fikrincə, bu mümkündür: "Ona görə də dünyanın bütün ölkələrində taxıl istehsalına ciddi əhəmiyyət verilir. Sovet dövründə respublikamızda 80 faiz əhalinin tələbatı idxal hesabına ödənilirdi. İndi də taxılçılıq sahəsində böyük işlər görülür. Dövlət tərəfindən buğda səpilən sahələrin hər hektarına, motor yağlarına görə subsidiya verilir. Gübrənin qiymətinin 70 faizi dövlət tərəfindən ödənilir. Yəni respublikamızda taxıl istehsalını artırmaq mümkündür. Ancaq taxıl istehsalı sahəsində ona görə geridə qalırıq ki, respublikada taxıl toxumçuluğu məsələsi tam həllini tapmayıb. Bu problem əsaslı surətdə həll olunmalıdır. Eyni zamanda, taxılçılıq ekstensiv yox, intensiv metodla inkişaf etdirilməlidir. Yəni inkişaf hektarı artırmaq yox, keyfiyyəti artırmaqla olmalıdır. Digər tərəfdən, pay torpaqları sahibkarlarının taxılçılığa diqqəti artırılmalıdır. Onlarla taxıl istehsalının istensiv artırılması istiqamətində fikir mübadiləsi aparılmalıdır. Ona görə də taxıl istehsalını artırmaq üçün ilk növbədə əhalidə olan taxılçılıq sahələrində əkin intensivləşdirilməlidir. Kiçik torpaq sahələri olan sahibkarlara yüksək keyfiyyətli toxum verilməli, gübrələrlə təmin olunmalıdır. İntensiv metodla taxıl istehsalının artımına nail olmaq lazımdır".
Vidadi ORDAHALLI
