Rəsul Cahangirli: "Hesab edirəm ki, vergi işinin müasir tələblərə uyğunlaşdırılması ölkə iqtisadiyyatının xeyrinədir"
Xəbər verildiyi kimi, büdcə gəlirləri üzrə proqnoz tapşırıqlarının tam həcmdə yerinə yetirilməsi məqsədilə Vergilər Nazirliyində bəzi struktur və kadr dəyişiklikləri aparılıb. Vergi orqanları tərəfindən nəzarət funksiyalarının həyata keçirilməsi mexanizminin müasir tələblərə uyğun olaraq daha da təkmilləşdirilməsi, büdcə gəlirləri üzrə proqnoz tapşırıqlarının tam həcmdə yerinə yetirilməsi məqsədilə nazirlikdə bəzi struktur və kadr dəyişiklikləri reallaşdırılıb.
Bununla bağlı Vergilər Nazirliyinin Kollegiyası müvafiq qərar qəbul edib. Məlumata əsasən, Vergi Cinayətlərinin İbtidai Araşdırılması Departamentində bu məsələlərlə birbaşa məşğul olacaq müvafiq struktur bölmə - İqtisadi sahədə mütəşəkkil cinayətkarlığa qarşı mübarizə idarəsinin tərkibində Qanunsuz sahibkarlıq fəaliyyətinə qarşı mübarizə şöbəsi yaradılıb.
Bununla yanaşı, Kollegiya iclasında sərəncamdan irəli gələn məsələlərlə bağlı görüləcək işlər, eləcə də icra intizamına nəzarətin və strukturlararası koordinasiyanın səmərəliliyinin artırılması ətrafında geniş müzakirələr aparılıb. Vergilər naziri Fazil Məmmədov qanunsuz sahibkarlıq, iri məbləğlərdə vergidən yayınma halları ilə mübarizə, işində nöqsanlara yol vermiş vergi xidməti əməkdaşları barəsində vergi orqanlarında xidmətinə xitam verilməsi də daxil olmaqla, ciddi cəza tədbirlərinin görülməsi ilə bağlı konkret tapşırıqlar verib.
Bütövlükdə VN-də aparılan struktur islahatları və Qanunsuz sahibkarlıq fəaliyyətinə qarşı mübarizə şöbəsinin yaradılmasını ekspertlər necə dəyərləndirir?
Məsələyə münasibət bildirən ekspert Rəsul Cahangirli bu yöndə görülən işləri dəstəklədiyini bildirdi: "Vergilər Nazirliyində aparılan struktur dəyişiklikləri bu qurumun daha çevik və dinamik fəaliyyət göstərməsinə təkan verəcək. Çünki son dövrlər qurumun fəaliyyətində bir sıra yeniliklər həyata keçirilir ki, bu da nazirliyin funksionallığına müsbət təsir göstərir. Bu həm vergidən yayınma halları ilə mübarizə tədbirləri baxımından, həm də vergi daxilolmalarının artması baxımından müsbət əhəmiyyət kəsb edir. Qanunsuz sahibkarlıq fəaliyyətinə qarşı mübarizə şöbəsinin yaradılması bu sahədə mövcud olan neqativ halların azalmasına öz təsirini göstərəcək. Eyni zamanda bu, qeyri-neft sektorunu əhatə edən sahələrdən vergi daxilolmalarının artmasına müsbət təsir edəcək. Hesab edirəm ki, vergi işinin müasir tələblərə uyğunlaşdırılması ölkə iqtisadiyyatının xeyrinədir". Vidadi ORDAHALLI
