Ötən gün Vergilər Nazirliyi digər dövlət qurumlarının iştirakı ilə "Elektron cinayət işi" modulunun tətbiqi ilə bağlı təqdimat mərasimi keçirdi. Təqdimat mərasimi "Marriot Abşeron" otelində baş tutdu.
Tədbir iştirakçılarını salamlayan vergilər nazirinin müavini, 3-cü dərəcəli vergi xidməti müşaviri Namiq Əliyev son illər vergi sistemində aparılan islahatlar barədə danışıb, ölkə Prezidentinin "2016-cı ildə vergi sahəsində aparılacaq islahatların istiqamətlərinin təsdiqi və vergi inzibatçılığının təkmilləşdirilməsi haqqında" 4 avqust tarixli sərəncamı və bu sərəncam çərçivəsində görülən işlər barədə ətraflı məlumat verdi. N.Əliyev bildirdi ki, sərəncamdan irəli gələn tapşırıqların icrası çərçivəsində Vergilər Nazirliyində "Elektron cinayət işi"nin tətbiqi ilə bağlı aparılan hazırlıq işləri artıq başa çatıb.
Vergi sistemində son illər elektron sahədə aparılan islahatlarla bağlı filmin nümayişindən sonra VN-in Vergi cinayətlərinin təhlili və vergi borclarının alınması Baş İdarəsinin rəisi Zeynalabdin Məmmədzadə təqdimatla çıxış edərək, vergi hüquqpozmalarına və cinayətkarlığa qarşı mübarizə sahəsində təhqiqat, istintaq və əməliyyat-axtarış fəaliyyətini həyata keçirən Vergi cinayətlərinin ibtidai araşdırılması Departamenti (VCİAD) tərəfindən aparılan istintaq işlərinin sürətinin və keyfiyyətinin artırılması, vahid elektron statistik uçot bazasının yaradılması, əlavə inzibatçılıq tədbirlərinin minimuma endirilməsi, iş vaxtına qənaət edilməsi, insan resurslarından daha səmərəli istifadə olunması məqsədilə, bu sahədə tətbiq olunan uğurlu beynəlxalq təcrübə öyrənilərək, VN-in Avtomatlaşdırılmış Vergi İnformasiya Sistemində (AVİS) "Elektron cinayət işi" modulunun hazırlanıb istifadəyə verildiyini bildirdi.
"Elektron cinayət işi" modulu barədə tədbir iştirakçılarına ətraflı izahat verən Z.Məmmədzadə qeyd etdi ki, bu, ibtidai istintaqı VN-in səlahiyyətlərinə aid edilmiş cinayətlər üzrə cinayət xarakterli faktları əks etdirən materialların Departamentə göndərilməsi, Departamentdə aparılan ibtidai araşdırma zamanı qərar, vəsatət, məktub və digər sənədlərin elektron formada hazırlanması məqsədilə yaradılmış, özündə daha geniş və dəqiq məlumatları əks etdirən, operativ axtarış imkanlarına malik olan cinayət işlərinin vahid elektron sistemidir.
Baş İdarə rəisi çıxışı zamanı onu da əlavə etdi ki, "Elektron cinayət işi" modulunun tətbiqi ilə bağlı ibtidai araşdırma zamanı qəbul oluna biləcək prosessual qərar, vəsatət və onları müşayiət edən məktubların, nazirlikdaxili məktubların (sorğuların), digər qurumlara göndəriləcək məktubların (sorğuların), ümumilikdə 100-dən artıq sənədin nümunəvi formaları hazırlanıb: "Modulun tətbiqinə 2016-cı il noyabrın 21-dən başlanacaq. Məsələ ilə bağlı VCİAD-ın müstəntiq və təhqiqatçıları üçün müvafiq treninqlərin keçirilməsi nəzərdə tutulur".
Z.Məmmədzadə jurnalistlərin suallarını cavablandırarkən bildirdi ki, VN-in kollegiyasının 7 sentyabr 2016-cı il tarixli qərarına əsasən, borclu vergi ödəyiciləri üzrə risq qrupu müəyyən edilib: "Yəni risq qrupları nazirlikdə mövcud olan məlumatlar əsasında vergi ödəyicilərinin 3 risq qrupu üzrə təsnifatlaşdırılması deməkdir. Risq qruplarının müəyyən edilməsində məqsəd vergi borcunu ödəmə potensialı daha çox olan vergi ödəyicilərinin müəyyən edilməsi və onlarla işin operativ şəkildə təşkilidir".
Z.Məmmədzadə onu da diqqətə çatdırdı ki, vergi borcları ilə bağlı olaraq 1100 nəfərin ölkədən çıxışına qadağa qoyulub: "Ölkədən getmək hüququnun məhdudlaşdırılması ilə bağlı məhkəmələrə müraciət etmək, Vergi Məcəlləsinə əsasən, vergi orqanlarının hüququdur. Belə şəxslərin adları mütəmadi olaraq yenilənir və ictimaiyyətə açıqlanır. Hələ ki, qanunvericiliyin tələblərinə əsasən, yalnız məhkəmə qərarı ilə vergi ödəyicisinin ölkədən getmək hüququ məhdudlaşdırılır".
Qeyd edək ki, tədbirdə Prezident Administrasiyası, Nazirlər Kabineti, Baş Prokurorluq, Vergilər, Daxili İşlər, Ədliyyə, Fövqəladə Hallar nazirlikləri, Dövlət Gömrük Komitəsi, Dövlət Təhlükəsizlik Xidməti, Dövlət Sərhəd Xidməti, Vəkillər Kollegiyasının nümayəndələri, bir sıra məhkəmə orqanlarının hakimləri və KİV nümayəndələri iştirak edib.
Günel CƏLİLOVA
