İlqar Hüseynli: "Bununla bağlı sistem yenilənməlidir"
Bölgələrin inkişafı həm də ora qoyulan xarici sərmayədən asılıdır. Yəni təkcə dövlət yardımı və yerli sahibkarlar hesabına rayonların inkişaf etdirilməsi çətindir. Təsadüfi deyil ki, bir müddət əvvəl Prezident İlham Əliyev bununla bağlı tələblərini səsləndirib.
Onun sözlərinə görə, yerli icra orqanları çalışmalıdır ki, öz rayonlarına yerli və xarici özəl sərmayə gətirsin: "Xaricə getmək, orada investorları inandırmaq lazımdır ki, sərmayə qoysunlar. Azərbaycanda kifayət qədər böyük firmalar, şirkətlər var. Onları maraqlandırmaq lazımdır. İndi yerli icra orqanlarının işi bundan ibarətdir. Çünki əsas infrastruktur layihələrinin icrası dövlətin məsuliyyətidir. Bu layihəyə dövlət böyük vəsait ayırıb. Biz son illər ərzində bu layihələrə milyardlarla manat vəsait ayırırıq. Ona görə yerli icra orqanları da gərək çalışsınlar ki, onların rəhbərlik etdikləri rayonlarda işlər daha sürətlə getsin. Rayonlar arasında çox sağlam rəqabət olmalıdır. Rayon rəhbərliyinə qiymət bu nəticəyə görə veriləcək".
Bundan başqa, Prezident Administrasiyası (PA) rəhbərinin müavini, PA-nın Regional idarəetmə və yerli özünüidarəetmə orqanları ilə iş şöbəsinin müdiri Zeynal Nağdəliyev də bənzər açıqlama verib. Z.Nağdəliyev bildirib ki, bundan sonra icra başçılarının fəaliyyətinə, bacarığına qiymət verilərkən əsas meyar kimi onların Prezidentin tapşırıqlarına nə dərəcədə əməl etməsi ilə yanaşı, rəhbərlik etdikləri rayonlara nə qədər yerli və xarici investisiya cəlb etməsi olacaq.
Ümumilikdə icra başçıları rayona xarici sərmayəni necə cəlb edə bilər? Ekspertlər bunun mexanizmi ilə bağlı nə təklif edir? Məsələyə münasibət bildirən ekspert İlqar Hüseynlinin sözlərinə görə, bunun üçün icra başçıları birinci növbədə şəffaf idarəçilik mühiti yaratmalıdır: "Məsələ ondadır ki, xarici investorlar hər bir ölkədə sərmayə mühitini araşdırır. Araşdırma zamanı onlar bir neçə aspekti xüsusi olaraq nəzərdən keçirir. Bunlar şəffaf idarəçilik, korrupsiyanın səviyyəsi və ölkənin ticarət indeksidir. Həmçinin, investisiya qoyulacaq sahələrdən hansı daha çox prioritet təşkil edir, bu da diqqət mərkəzində olur. İcra başçıları rayonda bununla bağlı normal mühit yaradarsa, o zaman xarici investisiya gəlməyə başlayacaq. Yox, icra başçısı bürokratik vasitələrdən, yerli-yersiz, istifadə edəcəksə, əlbəttə, çətin olacaq. Bu zaman nəinki xarici investorlar, heç yerli sahibkarlar da sərmayə qoymaqda maraqlı olmayacaq. Rayonlarda elə icra başçıları var ki, nəinki xarici sərmayədarlarla, heç yerli sahibkarlarla da doğru-düzgün rəftar etmir. Deməyim odur ki, bununla bağlı sistem yenilənməlidir. Digər tərəfdən, icra başçıları bununla bağlı qabaqcıl ölkələrin təcrübəsini öyrənməlidir. Yalnız bütün bu işlərin kompleks şəkildə görülməsindən sonra bu sahədə nəyəsə nail olmaq olar".
Vidadi ORDAHALLI
