Vüqar Bayramov: "Araq və siqaret məhsullarının idxalı, satışı və istehsalı ilə bağlı lisenziyanın ləğv olunması ölkə iqtisadiyyatına müsbət təsir edəcək"
Azərbaycanda alkoqollu içkilər və tütün məmulatı ilə bağlı ciddi yenilik var. Bundan sonra həmin məhsulların istehsalı, satışı və idxalı lisenziyasız həyata keçiriləcək. Bu dəyişiklik Prezident İlham Əliyevin noyabrın 7-də imzaladığı fərmanlarda nəzərdə tutulub.
Dövlət başçısının fərmanına görə, "Alkoqollu içkilər, etil (yeyinti) spirti və tütün məmulatı istehsalının, idxalının və satışının tənzimlənməsi sahəsində əlavə tədbirlər haqqında" Azərbaycan Prezidentinin 1999-cu il 5 fevral tarixli, 90 nömrəli Fərmanında dəyişikliklər edilib. Həmin fərmanın 3-cü hissəsinin birinci, ikinci və beşinci bəndləri, 4-cü, 5-ci və 11-ci hissələri ləğv edilib.
Qeyd edək ki, fərmanın 3-cü hissəsinin ləğv olunan bəndləri bunlar idi:
"1) ölkədə istehlak olunan alkoqollu içkilərin, etil (yeyinti) spirtinin və tütün məmulatının keyfiyyətini yaxşılaşdırmaq və uçotdan yayınmanın qarşısını almaq məqsədilə bu məhsulların istehsalı və idxalı üçün lisenziyaların verilməsi qaydalarına bir ay müddətində yenidən baxılsın və onların şərtlərini müəyyənləşdirsin;
4) etil (yeyinti) spirti və alkoqollu içkilər istehsal edən müəssisələrdə gündəlik dövlət nəzarətinin aparılması qaydalarını bir ay müddətində hazırlayıb təsdiq etsin;
5) aksiz markalarının hazırlanmasına dair sifariş verilməsi, onların satışı və uçotunun aparılması qaydalarını bir ay müddətində hazırlayıb təsdiq etsin".
Azərbaycanda alkoqollu içkilərin və tütün məmulatlarının istehsalı, satışı və idxalının lisenziyasız həyata keçirilməsi barədə fikir bildirən iqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, lisenziyanın ləğv olunması həmin sektorda sahibkarlıq fəaliyyətinin stimullaşdırılması məqsədini daşıyır: "Bəllidir ki, lisenziyanın alınması müəyyən zaman tələb edir. Hətta lisenziyanın verilməsi proseduru asanlaşdırılsa belə, bu proses uzun zaman tələb edir. Lisenziyanın alınması sahibkarlar üçün həm zaman baxımından sərf etmirdi, həm də müəyyən xərcə səbəb olurdu. Artıq lisenziyaların ləğv olunması həmin sahədə çalışan sahibkarların fəaliyyətinin daha da inkişafına səbəb olacaq. Bu sektorda məşğul olanlar sahibkarlıq fəaliyyəti ilə məşğul olmaqla daha çox gəlir əldə edə biləcək".
İqtisadçının sözlərinə görə, araq və siqaret məhsullarının idxalı, satışı və istehsalı ilə bağlı lisenziyanın ləğv olunması ölkə iqtisadiyyatına müsbət təsir edəcək.
Günel CƏLİLOVA
