Çingiz Fərəcov: "İstixanalara diqqət artırılmalıdır ki, bu sahədən əldə olunan məhsulların satış qiyməti hər bir ailənin büdcəsinə uyğun olsun"
İstixana sahəsinin inkişafı üçün təkliflər hazırlanır. Bu təkliflər İqtisadiyyat Nazirliyi və Azərbaycan Meyvə-Tərəvəz İstehsalçıları və İxracatçıları Assosiasiyasının (AMTA) birgə təşkilatçılığı ilə hazırlanır.
AMTA sədri Bəşir Quliyev media nümayəndələrinə açıqlamasında dövlət başçısının rəhbərliyi ilə aparılan iqtisadi, o cümlədən aqrar islahatların real nəticələr verdiyini və bu sektora aid sahibkarlığın inkişaf etdiyini bildirib. O qeyd edib ki, aqrar sahədə əhəmiyyətli rolu olan istixana təsərrüfatları üçün ciddi ixrac potensialı yaradılıb. B.Quliyev bu sahədə Azərbaycan üçün strateji bazar olan Rusiya və digər ölkələrə ixracın artırılmasının hədəf olduğunu bildirib. Diqqətə çatdırılıb ki, sözügedən sahədə inkişafa və ixracın artırılmasına dəstək üçün AMTA tərəfindən araşdırma və təhlillər aparılacaq.
Qeyd edək ki, AMTA nəzdində istixana sahəsi üzrə komissiyanın yaradılması qərara alınıb.
İstixana sahəsinin inkişafı üçün xüsusi təkliflər planının hazırlanması barədə fikir bildirən aqrar sahə üzrə ekspert Çingiz Fərəcov "Bakı-Xəbər"ə açıqlamasında bunları qeyd etdi: "İstixana sahəsinin inkişafına xüsusi diqqət ayrılmalıdır". Onun sözlərinə görə, Azərbaycanın iqlim şəraiti imkan verir ki, aprel ayından noyabrın əvvəlinə qədər açıq hava şəraitində tərəvəz yetişdirilsin: "Hətta eyni sahədən iki dəfə məhsul almaq olur. Məsələn, kələmi enli əkməklə onun arasında badımcan yetişdirmək olar. Kələm yığılandan sonra isə iyun-iyul aylarında həmin sahədən badımcan götürmək olar".
Ekspert bildirdi ki, son illər istixanalarda tərəvəz yetişdirilməsi genişləndirilib. Bu hal təqdirəlayiqdir. Lakin onu da nəzərə almaq lazımdır ki, həmin sahələrdən məhsul əldə etmək üçün ora gübrə verilir, pestisitlərdən istifadə olunur: "İstixana şəraitində kifayət qədər məhsul əldə olunsa da, əsas üstünlüyü açıq hava şəraitində yetişdirilən məhsullara yönəltmək lazımdır. Mən sizə deyim ki, Astara və Masallıda sahələr boş qalıb. Bu il adlarını qeyd etdiyim rayonlarda olarkən bunun şahidii oldum. Həmin sahələrdən aqrar sahənin inkişafı üçün istifadə etmək olar".
Həmsöhbətimiz onu da bildirdi ki, bu il iqlimin dəyişkən olması ilə bağlı meyvə-tərəvəz az oldu: "Normadan artıq yağışın yağması və ya yay fəslinin həddindən artıq isti keçməsi açıq hava şəraitində yetişdirilən meyvə-tərəvəzə öz təsirini göstərdi. Açıq hava şəraitində yetişdirilən meyvə-tərəvəzin həcmi az olduğu üçün xalqı istixanalar xilas etdi. İstixanalara diqqət artırılmalı və bu sahə ilə bağlı xüsusi təkliflər hazırlanmalıdır. Elə etmək lazımdır ki, istixana məhsullarının satış qiyməti hər bir ailənin büdcəsinə uyğun olsun".
Günel CƏLİLOVA
