Oqtay Haqverdiyev: "Banklar öz xərclərini azaltmaq və optimallaşdırmaq üçün paytaxtda olan bankomatların sayını azaldır"
Son zamanlar paytaxt Bakı ərazisində quraşdırılan bankomatların sayı azalır. Azərbaycanda quraşdırılan bankomatların ümumi sayı aylıq müqayisədə 1 ədəd (-0,04 %), ilin əvvəlindən isə 149 ədəd (-5,9 %) azalaraq 2016-cı il oktyabrın 1-nə 2 545 ATM təşkil edib. Bu barədə Mərkəzi Bankdan məlumat verilib.
Bildirilib ki, bankomatların 1 398 ədədi və ya 55 %-i Bakıda, 1 147-i ədədi və ya 45 %-i regionlarda yerləşir. Sentyabr ayında paytaxtda 3 bankomat ləğv olunub, regionda 2 bankomat quraşdırılıb. İlin əvvəli ilə müqayisədə paytaxtdakı bankomatların sayı 7 % və ya 104 ədəd, regionlarda isə 45 ədəd və ya 3,8 % azalıb.
Ötən ilin eyni dövrü ilə müqayisədə bankomatların sayında 162 ədəd və ya 6 %, o cümlədən paytaxtda 124 ədəd və ya 8 %, regionlarda isə 38 ədəd və ya 3 % azalma müşahidə olunub.
Hesabata əsasən, bu il oktyabrın 1-nə ölkədə hər 3,8 min nəfərə bir bankomat düşüb. İlin əvvəlində isə bu göstərici 3,6 min nəfər/ATM təşkil edib.
Bir ATM-ə düşən əməliyyatların orta aylıq həcmi isə sentyabrda 319 min manata enib. Bu da, öz növbəsində, əvvəlki ayla müqayisədə 1,8 % azalma deməkdir.
Paytaxt Bakı ərazisində bankomatların sayının azalması, regionlarda isə artması barədə fikir bildirən iqtisadçı-ekspert Oqtay Haqverdiyev qəzetimizə açıqlamasında qeyd etdi ki, Bakıda bankomatların sayının azalmasının səbəbləri məlumdur: "Bağlanan bankların bankomatları sıradan çıxarılır. Eyni ərazidə bir bankın bir neçə bankomatının olmasına lüzum yoxdur. Bu səbəbdən paytaxtın əksər rayonlarında eyni ərazidə olan bankomatlar ləğv olunub". Həmsöhbətimizin sözlərinə görə, rayonlarda bankomatlara tələb paytaxta nisbətən daha yüksəkdir: "Çünki bölgələrdə yaşayan yaşlı nəslin nümayəndələri təqaüdlərini həmin aparat vasitəsilə əldə edir. Həmçinin, hansısa rayonda bankomat quraşdırılıbsa, o rayona yaxın ərazidə yaşayanlar pul əldə etmək üçün həmin yerə gəlməli olurdu. Bölgələrdə yaşayanların rahatlığının təmini, onların uzun məsafə qət etməməsi üçün rayonlarda quraşdırılan bankomatların sayı artıb".
İqtisadçı onu da diqqətə çatdırdı ki, bankomatların və filialların azalması səbəblərindən biri də bəzi bankların müflis elan olunmasıdır: "Çünki bank müflis elan olunduqdan sonra, avtomatik olaraq, onun bankomatları və filialları da artıq fəaliyyətini dayandırır. Digər səbəb isə bankların öz xərclərini azaltması və optimallaşdırması istəyi ilə bağlıdır. Xüsusilə də filialların sayında azalmanın müşahidə edilməsi onunla bağlıdır ki, bir sıra banklar regional mərkəzlər yaradır. Bu mərkəzlər bir neçə rayonu əhatə edir. Buna uyğun olaraq da bankomat sayı azalır".
Günel CƏLİLOVA
