Vüqar Bayramov: "Problemli kreditlərin artması bank sektorunda likvidliyin azalmasına təsir göstərir"
"Azərbaycan Maliyyə Bazarlarına Nəzarət Palatası ölkədə keçid bankların yaradılması üçün normativ-hüquqi baza hazırlayır". Bu sözləri Palatanın Direktorlar Şurasının sədri Rüfət Aslanlı media nümayəndələrinə açıqlamasında deyib. Onun sözlərinə görə, hazırlanan qanun layihəsi problemli banklara təyin olunan müvəqqəti administratorların səlahiyyətlərinin artırılmasına yol açacaq.
Keçid bankı ödəniş qabiliyyəti olmayan bankların bazardan çıxması prosesində yaradılan maliyyə qurumudur. Bu cür bankın investorlara satılacağı günə qədər bank səhmlərinin idarə olunması Azərbaycan Əmanətlərin Sığortalanması Fonduna keçir.
Keçid bankların yaradılması barədə fikir bildirən iqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, bank sektorunun sağlamlaşdırılması vacibdir. Bank sektorunun sağlamlaşdırılması ilə bağlı xüsusi bir proqramın hazırlanmasına ehtiyac var: "O baxımdan hesab edirəm ki, birbaşa keçid dövründə bankların sağlamlaşdırılması ilə bağlı maliyyə qurumunun yaradılması nəzərdə tutulur. Güman olunur ki, keçid bankı mövcud bankların problemli kreditlərinin və aktivlərinin sağlamlaşdırılması məqsədi daşıyır. Keçid bankların yaradılmasında da məqsəd bankların sağlamlaşdırılmasına nail olmaq və problemli kreditlərin həcminin azalmasını həyata keçirməkdir. Bu gün bankların ən ciddi problemlərindən biri problemli kreditlərin həcminin artmasıdır. Problemli kreditlərin artması bank sektorunda likvidliyin azalmasına təsir göstərir. Bu səbəbdən də keçid bankın funksiyası sağlaşdırmaq olmalıdır. Keçid bank bankların problemli kredit və aktivlərini sağlamlaşdırmalıdır".
Həmsöhbətimizin dediyinə görə, keçid bank, bir növ, bank sektorunun bir mərhələdən digər mərhələyə keçidinin əsasını qoymalıdır: "Keçid bankın funksiyası, Amerikada olduğu kimi, qaytarılmayan kreditlərin və problemli aktivlərin qiymətli kağız formasında bazara çıxarılmasıdır və bu istiqamətdə vəsaitin ayrılmasını təmin edəcəksə, bank sektorunun sağlamlaşdırılması yönündə müsbət nəticələr gözləmək olar. O baxımdan birmənalı şəkildə hesab edirəm ki, keçid bank ənənəvi banklardan fərqli olaraq bank sektorunun sağlamlaşdırılmasına töhfə vermək məqsədilə yaradılmalıdır".
Günel CƏLİLOVA
