Toğrul Cuvarlı: "Maaşlar inflyasiya həddində artırılsa, böyük bir işdir"
Gələn il ölkədə əməkhaqlarının artımı gözlənir. Xəbər verildiyi kimi, bunu mətbuata Milli Məclisin İqtisadi siyasət, sənaye və sahibkarlıq komitəsinin sədri Ziyad Səmədzadə deyib. Onun sözlərinə görə, 2017-ci il dövlət büdcəsinin layihəsi bu günlərdə müzakirə üçün Milli Məclisə təqdim ediləcək. Komitə sədri qeyd edib ki, ilkin danışıqlara əsasən, büdcə proqnozları formalaşdırılarkən 1 barrel neftin orta illik qiymətinin 40 dollar götürülməsi nəzərdə tutulur.
Z.Səmədzadə qeyd edib ki, gələn ilin büdcə layihəsində sosial proqramların sayının azaldılması nəzərdə tutulmur.
Komitə sədrinin fikrincə, Azərbaycan iqtisadiyyatında fəallıq artırılmalı, ixrac potensialımız gücləndirilməli, iş yerlərində ixtisarlar olmamalıdır: "Bu istiqamətdə görülən işlərin davamlılığını təmin etməliyik. Hələlik o qədər də zəruri olmayan investisiya layihələrini bir qədər ixtisara salmalıyıq. Bütövlükdə Azərbaycan iqtisadiyyatının canlanmasına nail olmalıyıq. Sosial mənzillərin tikintisinə başlanacaq. Bu layihələrin həyata keçirilməsi, şübhəsiz ki, ölkədə iqtisadi fəallığı artıracaq".
İnflyasiyanın səviyyəsi əməkhaqlarının və pensiyaların artırılması zərurətini yaradır. Təbii ki, artımlar büdcənin imkanları çərçivəsində olacaq. O baxımdan maraqlıdır, gələn il əməkhaqları nə qədər artırılacaq? Məsələyə münasibət bildirən iqtisadçı-ekspert Toğrul Cuvarlının fikrincə, artımlar zamanı mütləq inflyasiya həddi nəzərə alınmalıdır: "Azərbaycanda indeksasiya haqqında qanun var. Həmin qanun çərçivəsində dövlət müəssisələrində maaşlar, təqaüdlər inflyasiya həddində qaldırılmalıdır. Amma reallıqda bu amil çox cüzi şəkildə nəzərə alınır. Böhran başlandıqda isə indeksasiyanı reallaşdırmaq kifayət qədər çətin bir iş olur. Düşünürəm ki, hökumət indiki durumu nəzərə alıb maaşları artıracaq. Maaşlar inflyasiya həddində artırılsa, böyük bir işdir. Əslində məlumdur ki, ölkədə minimal əməkhaqqı - 105 manat 2013-cü ildən dəyişməz olaraq qalıb. Bu o deməkdir ki, əhalinin minimum yaşayış səviyyəsi nəzərə alınmayıb və əhalinin sosial durumuna diqqət artırılmalıdır. Fikrimcə, hökumət vəziyyətin getdikcə çətinləşdiyini görüb bunu nəzərə alacaq. Ölkədə insanların müəyyən dərəcədə ümid yeri 2018-2019-cu illərədir. Ölkədə təməli qoyulan müəssisələrin açılışı məhz həmin dövrlərə təsadüf edəcək. Bu baxımdan 2017-ci ilin kifayət qədər çətin il olacağını qəbul etmək lazımdır. Ancaq yaranan bu durumda əllərini əllərin üstünə qoyub dayanmaq da bir iş deyil. Ən az ziyan görmək üçün müəyyən addımlar atmaq lazımdır. Bu istiqamətdə inamlı addımlamaq üçün ölkəyə investisiya qoyuluşunu təmin etmək lazımdır. İndiki durumda yeganə yol budur.
Vidadi ORDAHALLI
