"Elektron cinayətlər" nədir və Vergilər Nazirliyinin yeni startı nə vəd edir...
Rəsul Cahangirli: "Elektron cinayət işi" modulunun tətbiqi imkan verəcək ki, bu sahədə mövcud olan neqativ hallar daha operativ araşdırılsın"
Vergilər Nazirliyi "Elektron cinayət işi"nin tətbiqinə başlayır. Belə ki, vergi hüquqpozmalarına və cinayətkarlığa qarşı mübarizə sahəsində təhqiqat, istintaq və əməliyyat-axtarış fəaliyyətini həyata keçirən Vergilər Nazirliyi yanında Vergi Cinayətlərinin İbtidai Araşdırılması Departamenti tərəfindən aparılan istintaq işlərinin sürətinin və keyfiyyətinin artırılması, vahid elektron statistik uçot bazasının yaradılması, əlavə inzibatçılıq tədbirlərinin minimuma endirilməsi, iş vaxtına qənaət edilməsi, insan resurslarından daha səmərəli istifadə olunması məqsədilə, bu sahədə tətbiq olunan uğurlu beynəlxalq təcrübə öyrənilərək, nazirliyin Avtomatlaşdırılmış Vergi İnformasiya Sistemində (AVİS) "Elektron cinayət işi" modulu hazırlanıb və istifadəyə verilib.
"Elektron cinayət işi" modulu ibtidai istintaqı Vergilər Nazirliyinin səlahiyyətlərinə aid edilmiş cinayətlər üzrə cinayət xarakterli faktları əks etdirən materialların departamentə göndərilməsi, departamentdə aparılan ibtidai araşdırma zamanı qərar, vəsatət, məktub və digər sənədlərin elektron formada hazırlanması məqsədilə yaradılmış, özündə daha geniş və dəqiq məlumatları əks etdirən, operativ axtarış imkanlarına malik olan cinayət işlərinin vahid elektron sistemidir.
"Elektron cinayət işi" modulunun tətbiqi ilə bağlı ibtidai araşdırma zamanı qəbul oluna biləcək prosessual qərar, vəsatət və onları müşayiət edən məktubların, nazirlikdaxili məktubların (sorğuların), digər qurumlara göndəriləcək məktubların (sorğuların), ümumilikdə 100-dən artıq sənədin nümunəvi formaları hazırlanıb.
Modulun tətbiqinə 2016-cı ilin noyabr ayının 21-dən başlanacaq. Məsələ ilə bağlı departamentin müstəntiq və təhqiqatçıları üçün treninqlər, habelə ictimaiyyət üçün təqdimat keçiriləcək.
Maraqlıdır, ekspertlər bunu necə dəyərləndirir?
Məsələyə münasibət bildirən ekspert Rəsul Cahangirli Vergilər Nazirliyinin bu təşəbbüsünü dəstəklədiyini bildirdi: "Hesab edirəm ki, bu çox faydalı və müasir tələblərə cavab verən bir yenilikdir. Ona görə ki, "Elektron cinayət işi" modulunun tətbiqi imkan verəcək ki, bu sahədə mövcud olan neqativ hallar daha operativ araşdırılsın. Bu da, öz növbəsində, sözügedən sahədə effektiv nəticənin əldə olunmasına kömək edə bilər. Yəni bu sahədə işin daha çevik və effektiv həyata keçirilməsinə yardım edəcək. İbtidai araşdırma zamanı qəbul oluna biləcək prosessual qərar, vəsatət və onları müşayiət edən məktubların, digər sənədlərin elektron formada həyata keçirilməsi səmərəli nəticə verə bilər. Bu imkan verəcək ki, həmin sahədə baxılması yubanan işlərin sayı azalsın. Çünki elektron formada olmayanda işlərə baxılması müəyyən zaman alır. Nəticədə digər işlərə baxılması yubanır. Ancaq bundan sonra belə olmayacaq. Bütün bunlar ümumi işin xeyrinədir. Ona görə də belə bir qərarın verilməsi təqdirəlayiq haldır".
Vidadi ORDAHALLI
