İldırım Qurbanov: "Maliyyə sabitliyi, birinci növbədə, ölkə ərazisində xarici valyutaya tələbatın ödənilməsindən keçir"
Azərbaycanın Maliyyə Bazarlarına Nəzarət Palatasının Direktorlar Şurasının sədri Rüfət Aslanlı maliyyə sabitliyinin təmin olunması istiqamətində Dünya Bankının hazırladığı tövsiyələrə dair maliyyə sektoru üzrə baş mütəxəssis Anjela Priqojinanın rəhbərlik etdiyi nümayəndə heyətini qəbul edib.
Dünya Bankının (DB) təmsilçiləri ilə növbəti müzakirələrin predmeti bank nəzarəti sahəsində islahatların keçirilməsi ilə bağlı fəaliyyət planı, xüsusilə, işləməyən kreditlər probleminin həlli, həmçinin Azərbaycan banklarında yatırımların sığortalanması olub.
Nəzarət Palatasından verilən məlumata görə, əmanətlərin sığortalanması, qeyri-işlək kreditlər probleminin həllinə dair keçirilmiş görüşdə bank nəzarəti sahəsində aparılan islahatlar üzrə tədbirlər planı müzakirə edilib.
Görüşdə maliyyə sabitliyi üzrə hüquqi, tənzimləyici və nəzarətlə bağlı islahatlar gündəliyi üzrə fəaliyyət planının və maliyyə sabitliyinin təmin olunması istiqamətində qarşıda duran məqsədlərin yerinə yetirilməsinə dair geniş fikir mübadiləsi aparılıb.
Ümumilikdə DB-nin maliyyə sabitliyi ilə bağlı tövsiyələri nə kimi effekt verə bilər?
Məsələyə münasibət bildirən iqtisadçı-ekspert İldırım Qurbanovun sözlərinə görə, nəinki DB, o cümlədən digər tanınmış nüfuzlu maliyyə qurumlarının məsləhətlərindən faydalanmaq lazımdır: "Çünki onların bununla bağlı müəyyən təcrübəsi var və bundan yararlanmaq lazımdır. Orada bizə xeyirli olan məqamlardan yararlansaq, daha yaxşı olar. Bu o demək deyil ki, Dünya Bankı nə deyirsə, o cür də etmək lazımdır. Təbii ki, yox. Bir məsəl var, deyir: "məsləhətə qulaq as, amma onların içində sənə uyğun olanı seç". Bu tövsiyələr də təxminən o anlama gəlir. Hesab edirəm ki, bu tövsiyələrdən yararlanmaq lazımdır. Maliyyə sabitliyi, birinci növbədə, ölkə ərazisində xarici valyutaya tələbatın ödənilməsindən keçir. Tələb və təklifdə qanunauyğunluq varsa, bu gözlənilirsə, o zaman maliyyə sabitliyini təmin etmək çətin olmur. Yox, uyğunluq pozulursa, o zaman çətin olur. Burada söhbət dövriyyədəki pul kütləsinin mövcud iqtisadi vəziyyətə uyğunlaşdırılmasından gedir".
Vidadi ORDAHALLI
