Zakir Əhmədov: "Qeyri-neft sektorunda artım..."
Avropa Yenidənqurma və İnkişaf Bankı Azərbaycanda 2016-cı il üzrə resessiya ilə bağlı proqnozunu 3 % səviyyəsində saxlayıb. Bu barədə bankın regional iqtisadi icmalında deyilir. AYİB Azərbaycanda 2017-ci ildə iqtisadi artımla bağlı proqnozunu 1 % səviyyəsində qoruyub.
Qeyd edək ki, may ayından etibarən proqnoz bu səviyyədə olub: "Yanvar-sentyabr aylarında Azərbaycanın ÜDM-i ötən ilin analoji dövrü ilə müqayisədə 3,9 % azalıb. Qeyd edilən dövrdə neft sektoru üzrə ÜDM 6,1 % azalıb. Ötən illərdə iqtisadi artımın əsas drayveri olan sahələrə investisiyaların həcmində də azalma müşahidə olunub. Milli valyutaya inamın artırılması cəhdlərinə baxmayaraq, hesabat dövründə manata təzyiqlər davam edib. İnflyasiya 2015-ci ildəki 4 % səviyyəsindən 11,2 %-dək artıb ki, buna manatın ucuzlaşması səbəb olub".
Müqayisə üçün qeyd edək ki, İqtisadiyyat Nazirliyi tərəfindən hazırlanmış iqtisadi və sosial inkişaf konsepsiyası və proqnoz göstəricilərinə əsasən, 2017-ci ildə ölkədə ÜDM-in real iqtisadi artımı 1 faiz olmaqla, 61,4 milyard manat təşkil edəcək.
2018-2020-ci illər ərzində artım tendensiyasının davam edəcəyi və 2020-ci ildə ÜDM-in real artım tempinin 2,4 faiz olacağı proqnozlaşdırılır.
2017-ci ildə sahə strukturuna görə ümumdaxili məhsulun 4 milyard manatı və ya 6,4 faizi kənd, meşə və balıqçılıq təsərrüfatının, 22,2 milyard manatı və ya 36,2 faizi sənayenin, 6,1 milyard manatı və ya 9,9 faizi tikintinin, 24,3 milyard manatı və ya 39,6 faizi xidmətlərin istehsalının, 4,8 milyard manatı və ya 7,8 faizi məhsula və idxala xalis vergilərin payına düşəcək.
Bütövlükdə ekspertlər bunu necə dəyərləndirir? Məsələyə münasibət bildirən ekspert Zakir Əhmədovun sözlərinə görə, istənilən halda, gələn il artım olacaq: "Ola bilsin ki, iqtisadi artım daha çox olsun. İndidən nəyisə konkret proqnozlaşdırmaq çətindir. Ona görə ki, bir sıra hallarda verilən proqnozlar özünü doğrultmur. Neftin qiyməti bir qədər bahalaşsa, o zaman Azərbaycanda gələn il iqtisadi artım daha çox ola bilər. Digər tərəfdən, Azərbaycanda aparılan sistemli islahatlar onu deməyə əcas verir ki, qeyri-neft sektorunda artım olacaq. Bu da ümumi iqtisadi artıma müsbət təsir edəcək" Vidadi ORDAHALLI
