Azər Allahverənov: "Azərbaycan Respublikasında hüquqi şəxslər tərəfindən təsis edilən şirkətlərdə müəyyən kateqoriyada çalışacaq insanların işə dəvəti üçün ayrıca icazə tələb olunmayacaq"
Əcnəbilərə və ya vətəndaşlığı olmayan iş adamlarına Azərbaycan ərazisində yaşamaq və işləmək izni ilə bağlı güzəştlər tətbiq olunacaq. Milli Məclisin yaydığı məlumata görə, Azərbaycan Prezidentinin təqdimatı ilə bununla bağlı Miqrasiya Məcəlləsinə əlavələr təklif edilir.
Layihəyə əsasən, Məcəllənin 45-ci (Əcnəbilərə və vətəndaşlığı olmayan şəxslərə Azərbaycan Respublikasının ərazisində müvəqqəti yaşamaq üçün icazə verildiyi hallar) maddəsinə edilən əlavəyə görə, Azərbaycanda təsis edilmiş və təsisçisi, yaxud təsisçilərdən ən azı biri xarici hüquqi və ya fiziki şəxs olan hüquqi şəxsin rəhbəri və onun müavini vəzifəsini tutan əcnəbi və vətəndaşlığı olmayan şəxslərə müvəqqəti yaşama icazəsi veriləcək.
Məcəllənin 64-cü (İş icazəsinin alınması tələb olunmayan hallar) maddəsinə təklif edilən əlavəyə görə isə, müvafiq icra hakimiyyəti orqanının müəyyən etdiyi fəaliyyət sahələri üzrə işlərin görülməsi və ya xidmətlərin göstərilməsi üçün Azərbaycan Respublikasının vətəndaşları, yaxud Azərbaycan Respublikasında təsis edilmiş hüquqi şəxslər tərəfindən dəvət edilmiş müvafiq icra hakimiyyəti orqanının müəyyən etdiyi kateqoriyaya aid mütəxəssislərdən işləmək üçün icazənin alınması tələb olunmayacaq.
Təklif olunan digər əlavəyə görə, Azərbaycan Respublikasında təsis edilmiş və təsisçisi, yaxud təsisçilərdən ən azı biri xarici hüquqi və ya fiziki şəxs olan hüquqi şəxslərin rəhbərləri və onların müavinlərinə də bu tələblər irəli sürülməyəcək.
Miqrasiya məsələləri üzrə ekspert Azər Allahverənov "Bakı-Xəbər"ə açıqlamasında qeyd etdi ki, Miqrasiya Məcəlləsində xarici miqrantların işə qəbul olunması ilə bağlı konkret müddəalar əks olunub: "Həmin müddəalardan irəli gələrək dövlətin bu sahədə siyasəti həyata keçirilən zaman müəyyən məqamlar var ki, onlar qanunvericiliklə nəzərdə tutulmadığından, bəzi ziddiyyətlərə səbəb olurdu. Qanunvericilikdə qeyd olunur ki, əcnəbinin işə götürülməsi üçün icazə tələb olunmur. Burada böyük bir siyahı verilir. Məsələn, sahibkarlıqla məşğul olan, diplomatik qurumlarda və ya digər təşkilatlarda işləyən əcnəbilər üçün icazə tələb olunmur. Miqrasiya sahəsi daim inkişaf edir. Bu sahə inkişaf etdiyi üçün yeni imkanlar yaradılır. Ancaq bu imkanların reallaşdırılması qanunvericilikdə müvafiq dəyişikliklərin edilməsinə səbəb olur. İrəli sürülən təklifdə işləmək üçün icazə alınması tələb olunmayacaq. Bir növ, dövlət öz marağını göstərəcək ki, Azərbaycan Respublikasında hüquqi şəxslər tərəfindən təsis edilən şirkətlərdə müəyyən kateqoriyada çalışacaq insanların işə dəvəti üçün ayrıca icazə tələb olunmasın".
Həmsöhbətimizin sözlərinə görə, Azərbaycanda gəlir əməyi ilə məşğul olmaq istəyən miqrantların sayı çoxdur. Bu səbəbdən Məcəllənin 45-ci maddəsinə edilən əlavəyə görə, əcnəbilərə və vətəndaşlığı olmayan şəxslərə Azərbaycan Respublikasının ərazisində müvəqqəti yaşamaq üçün icazə verilməsi ölkə ərazisində əmək fəaliyyəti ilə məşğul olmaq istəyən əcnəbilər üçün daha əlverişli şərait yaradır: "Ziddiyyətli məqamlar var idi, bunu tam reallaşdırmaq mümkünsüz idi. Artıq bu məqamlar aradan qaldırılıb".
A.Allahverənov onu da bildirdi ki, Miqrasiya Məcəlləsinin zaman-zaman təkmilləşdirilməsinə ehtiyac var.
Günel CƏLİLOVA
