Vüqar Bayramov: "Amerikada həmin kreditlər səhmləşdirilərək bazara çıxarılır"
Hazırda ölkə iqtisadiyyatının, əsasən də bank sektorunun ən ciddi problemlərindən biri problemli kreditlərin həcminin günbəgün artmasıdır. Problemli kreditlərin həcmi 1,5 milyardı keçib. Problemli kreditlərin həll olunması istiqamətində həm mətbuatda, həm də millət vəkilləri tərəfindən dəfələrlə fikirlər səsləndirilib.
Problemin aktual olduğu hazırkı məqamda deputat Vahid Əhmədov maraqlı təkliflərlə çıxış edib. Millət vəkili bildirib ki, vaxtı keçmiş kreditlərlə əlaqədar dünya praktikası var və Azərbaycanda da o təcrübədən istifadə edilə bilər: "Çində, Asiya və Cənubi Amerika dövlətlərində belə problemlər yaşanıb. Vaxtı keçmiş kreditlərin miqdarı çoxalanda xüsusi qurum yaradırlar. Vaxtı keçmiş kreditlərin qaytarılması ilə bağlı agentlik yaradırlar və bu agentlik birbaşa dövlət başçısına tabe olur. Azərbaycanda da Maliyyə Bazarlarına Nəzarət Palatası var. Bu Palata həmin agentliyi nəzarətdə saxlamalı və yoxlamalıdır. Bu problem vaxtında önlənməsə, gələcəkdə daha böyük çətinliklər yarada bilər. Çünki bankların sağlamlaşdırılması üçün bu çox vacibdir".
Problemli kreditlər üzrə agentliyin yaradılması təklifini müstəqil iqtisadçılar da müsbət dəyərləndirir.
İqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, problemli kreditlərlə bağlı dövlət proqramının qəbul olunmasına ehtiyac var: "Amerikada problemli kreditlərlə bağlı xüsusi dövlət proqramı qəbul olunub. Həmin dövlət proqramı çərçivəsində problemli kreditlərin sağlamlaşdırılması həyata keçirilir. Hətta bu istiqamətdə ABŞ-da 400 milyard dollardan artıq vəsait xərclənib. Azərbaycanda problemli kreditlər üzrə agentlik deyil, xüsusi bir proqramın yaradılmasına ehtiyac var. Problemli kreditlər üzrə xüsusi dövlət proqramının qəbul olunması imkan verəcək ki, problemli aktivləri və kreditləri tənzimləmək mümkün olsun. Problemli kreditlər tənzimlənərsə, dövlət tərəfindən sağlamlaşdırıla bilər. Necə ki, Amerikada həmin kreditlər səhmləşdirilərək bazara çıxarılır. Belə olan halda, banklar sağlamlaşdırılır və problemli kreditlərin həcmi azalır. Uyğun praktikanı tətbiq etmək olar. Belə bir proqram qəbul olunsa, bankların sağlamlaşdırılmasına və problemli kreditlərin həcminin azalmasına gətirib çıxarar".
Günel CƏLİLOVA
