Qulu İsmayılov: "Yunanıstan dövlətinin bu özəlləşdirməni başa çatdırmağa marağı varsa, ümid edirik ki, hansısa təkliflər veriləcək"
Azərbaycan Respublikası Dövlət Neft Şirkəti (SOCAR) Yunanıstanın DESFA qaz operatorunun səhmlərinin 66 faizinin alınması ilə bağlı zəmanət məktubunun müddətini daha bir ay uzadıb. Bu barədə "SOCAR Energy Greece" şirkətinin icraçı direktoru Anar Məmmədov məlumat verib.
Bir neçə ay bundan əvvəl SOCAR zəmanət məktubunun müddətini oktyabrın 31-dək uzatmışdı.
Qeyd edək ki, DESFA-nın səhmlərinin əldə olunmasında SOCAR-dan başqa, İtaliyanın SNAM şirkəti də maraqlıdır. Bununla belə, hər iki şirkət səhmlərin 66 faizi üçün müəyyən olunan 400 milyon avro qiymətini yüksək hesab edir.
Xatırladaq ki, SOCAR 2013-cü ildə DESFA-nın səhmlərinin əldə olunması üzrə tenderdə qalib gəlib.
SOCAR-ın bu addımını nə ilə izah etmək olar?
İqtisadçı Qulu İsmayılov qəzetimizə açıqlamasında bildirdi ki, SOCAR Yunanıstan üçün kompromis qapılarını bir az da açıq saxlayır: "Bilirsiniz ki, bu sövdələşmədə Yunanıstan tərəfinin qaydaları pozması səbəbindən anlaşılmazlıq yarandı. İyul ayında Yunanıstan hökuməti tərəfindən energetika nazirinin təşəbbüsü ilə qanunvericiliyə bir neçə dəyişiklik edilib. Bunun da DESFA-nın tariflərinə çox mənfi təsiri olub. Bizim fikrimizcə, DESFA-nın dəyəri 50 % azalıb. Azərbaycan tərəfi bəyan etdi ki, bu dəyişikliklərin olduğu kimi qalması bizim üçün o qədər də maraqlı deyil. Bu barədə Yunanıstan dövlətinə mövqeyimizi bildirdik. Yunanıstan tərəfinə birlikdə kompromis tapmaq üçün təklif verildi. Yəqin ki, müqavilə müddətinin bir dəfə də uzadılmasını onlara verilən sonuncu şans kimi qiymətləndirmək olar. Yunanıstan dövlətinin bu özəlləşdirməni başa çatdırmağa marağı varsa, ümid edirik ki, hansısa təkliflər veriləcək. Bizim tələbimiz çox sadədir - bu özəlləşdirmədə maraqlı olduğumuzu bildiririk və prosesi başa çatdırmaq istəyirik, lakin şərtlər kommersiya nöqteyi-nəzərdən məntiqli olmalıdır. DESFA ilə bağlı hər şey hazırda Yunanıstan dövlətindən asılıdır".
Məhəmmədəli QƏRİBLİ
