İldırım Qurbanov: "Hesab edirəm ki, Azərbaycan bundan düzgün istifadə etməlidir"
Azərbaycandan mal ixracı ilə məşğul olan sahibkarlara vəd edildiyi kimi, ixrac etdikləri malın dəyərinin 3-6 faizi qədər ödəniş veriləcək. Bu barədə jurnalistlərə açıqlamasında iqtisadiyyat naziri Şahin Mustafayev məlumat verib.
Onun sözlərinə görə, artıq iki sahibkar bu məqsədlə İqtisadiyyat Nazirliyinə müraciət edib. Nazir, həmçinin, "Made in Azerbaijan" brendinin tanınması ilə bağlı görülən işlər barədə də danışıb. Azərbaycan ticarət nümayəndəlikləri institutunun yaradılmasını planlaşdırır. O bu istiqamətdə həyata keçirilən tədbirlərin tərkib hissəsi kimi Azərbaycanın 3 ölkədə - Rusiya, Çin və BƏƏ-də ticarət nümayəndəliklərinin açılacağını deyib: "İlin sonunadək Rusiya, Çin və Birləşmiş Ərəb Əmirliklərində ticarət nümayəndələrimizi təyin edəcəyik. Onlar Azərbaycanın bu ölkələrdəki diplomatik nümayəndəliklərinin əməkdaşları statusu alacaq".
Ş.Mustafayev əlavə edib ki, ixracın təşviqi üçün Azərbaycanda belə institutun yaradılması çox mühümdür.
Bütövlükdə götürəndə xarici ölkələrin təcrübəsində ticarət nümayəndəlikləri institutu var və bu özünü doğruldan bir təsisatdır. O baxımdan Azərbaycanın da bir sıra ölkələrdə ticarət nümayəndəliyi açması qeyri-neft sektoru sahəsində ixracın təşviqinə və bu sahədən gələn gəlirlərin artmasına nə kimi təsir göstərəcək?
Sözügedən məsələ ilə bağlı fikirlərini "Bakı-Xəbər"lə bölüşən iqtisadçı-ekspert İldırım Qurbanovun sözlərinə görə, xarici ölkələrdə ticarət nümayəndəliklərinin açılması ixracın təşviqinə stimul verəcək: "Əvvəla bundan əvvəl yerli istehsalın gücləndirilməsinə önəm verilməlidir. İstehsal olmalıdır ki, ondan sonra biz xarici ölkələrdə bazarın təyin olunmasına çalışaq. Deməyim odur ki, bir sıra xarici dövlətlərdə yaradılacaq ticarət nümayəndəlikləri, bir növ, bazarın təyin olunması işini aparacaq. Yəni bazarı öncədən müəyyən etmək, sonra da bazarın tələbatına uyğun məhsul istehsal etmək lazımdır. Ona görə də sözügedən nazirlik tərəfindən belə bir addımın atılması çox təqdirəlayiq və düzgündür. Bu, yerli istehsalın artmasına, ən başlıcası, qeyri-neft sektorunun inkişafına təkanverici təsir göstərəcək. Bu siyasətin aparılmasında məqsəd qeyri-neft sektorunun inkişaf etdirilməsi və neftdən asılılığın aradan qaldırılmasıdır. Bir sıra Avropa dövlətləri bir zamanlar bu vasitədən geniş istifadə edib və bu müsbət səmərə verib. Hesab edirəm ki, Azərbaycan bundan düzgün istifadə etməlidir".
Vidadi ORDAHALLI
