Əli Əlirzayev: "Dağıstanda kənd təsərrüfatı məhsulu istehsal etmək sərfəli, rentabelli olsa, azərbaycanlı sahibkarlar buna maraq göstərəcək"
Dağıstan kənd təsərrüfatı məhsullarının yetişdirilməsi üçün azərbaycanlı sahibkarlara icarə əsasında torpaq verməyə hazırdır. Xəbər verildiyi kimi, bunu VII Azərbaycan-Rusiya regionlararası forumunda Dağıstan prezidenti Ramazan Abdulatipov deyib: "Əgər azərbaycanlı sahibkarların Dərbənddə torpaq icarəyə götürərək kənd təsərrüfatı məhsulları yetişdirmək imkanı varsa, niyə də bu imkandan istifadə olunmasın?"
Dağıstan prezidenti bu üsulun kənd təsərrüfatı məhsullarının Azərbaycanda istehsal olunaraq Rusiyaya göndərilməsindən daha məqsədəuyğun olacağını bildirib.
Məlumat üçün qeyd edək ki, bundan əvvəl də keçirilən forumlarda Dağıstanın investisiya imkanları və azərbaycanlı iş adamlarının ora investisiya yatırıb iş qurmasının vacibliyi qeyd olunub. R.Abdulatipov bildirib ki, azərbaycanlı iş adamları, əsasən kiçik və orta sahibkarların Dağıstanın turizm və istirahət, tikinti, kənd təsərrüfatı, o cümlədən müasir istixanaların yaradılması, logistika mərkəzlərinin açılması, sənaye və digər sahələrinə investisiya qoyması, yaxud birgə müəssisələr yaratması üçün əlverişli imkanlar açılıb: "Biz Mahaçqala yaxınlığında sənaye parkı yaratmışıq, orada hər cür infrastruktur var, hər şey hazırdır. Sahibkarlar layihələrini təqdim edib müəssisələr aça bilər. Bizim turistləri cəlb edə bilmək üçün orada müasir otellərə, istirahət mərkəzlərinə kəskin ehtiyacımız var. Azərbaycanlı iş adamlarını bu sahəyə də yatırım qoymağa dəvət edirəm".
Ümumilikdə, Dağıstanda kənd təsərrüfatı məhsullarının yetişdirilməsi üçün azərbaycanlı sahibkarlara icarə əsasında torpaqların təklif olunması təklifini ekspertlər necə dəyərləndirir?
Sözügedən məsələni dəyərləndirən iqtisadçı-alim Əli Əlirzayevin fikrincə, bunun nə dərəcədə sərfəli olduğunu nəzərdən keçirmək lazımdır: "Yalnız ondan sonra fermerlər buna qərar verə bilər. Nəzərə almaq lazımdır ki, Azərbaycanda da bu sahədə xeyli görüləsi işlər var. Artıq dövlət səviyyəsində müəyyən stimullaşdırıcı tədbirlər görülür. Bir müddət əvvəl də Dağıstan rəhbəri azərbaycanlı iş adamlarını ora investisiya qoymağa çağırmışdı. Deməyim odur ki, investisiyanı ölkəyə yatırmaq üçün sahibkarları sərfəli şərtlərlə cəlb etmək lazımdır. Şərtlər əlverişli, cəlbedici olsa, əlbəttə, sahibkar sərmayə yatıracaq. O cümlədən bu, fermerlərə də aid olan məsələdir. Dağıstanda kənd təsərrüfatı məhsulu istehsal etmək sərfəli, rentabelli olsa, azərbaycanlı sahibkarlar buna maraq göstərəcək. Yox, bunlar qaneedici olmasa, qoyulan xərc əldə olunacaq gəlirdən çox olacaqsa, o zaman maraq göstərməzlər. Bax, bu kimi məsələlər var. Bütün hallarda, hesab edirəm ki, fermerlər təklifləri dəyərləndirməlidir".
Vidadi ORDAHALLI
