Məhərrəm Zülfüqarlı: "Görünür, bu və digər amillər turizm sahəsində bir sıra sənədlərin imzalanmasına təkan verib"
Bakıda keçirilən VII Azərbaycan-Rusiya regionlararası forumunda əsasən investisiya və turizm yönümlü sənədlər imzalanıb. Belə ki, iki ölkə rəsmiləri humanitar və iqtisadi sahələri əhatə edən bir sıra sənədlər imzalayıb.
İmzalanan sənədlər arasında Azərbaycanda İxracın və İnvestisiyaların Təşviqi Fondu (AZPROMO) ilə Stavropol diyarının Ticarət-Sənaye Palatası arasında əməkdaşlıq haqqında saziş, AZPROMO və Dağıstanın Sahibkarlıq və İnvestisiya Agentliyi arasında əməkdaşlıq haqqında memorandum, AZPROMO və Xəzər regionunda Xarici İqtisadi Fəaliyyət Assosiasiyası arasında memorandum, Azərbaycanın Meyvə-Tərəvəz İstehsalçıları və İxracatçıları Assosiasiyası ilə Xəzər regionunda Xarici İqtisadi Fəaliyyət Assosiasiyası arasında əməkdaşlıq haqqında memorandum, Azərbaycan Tibb Universiteti ilə Stavropol Dövlət Tibb Universiteti arasında əməkdaşlığa Çərçivə Sazişi, Qəbələ Rayon İcra Hakimiyyəti ilə Rusiyanın Stavropol diyarının Kislovodsk kurort şəhəri administrasiyası arasında qardaşlaşma və əməkdaşlıq haqqında saziş, Bakının Nərimanov Rayon İcra Hakimiyyəti ilə Rusiyanın Həştərxan vilayəti arasında əməkdaşlıq haqqında niyyət protokolu, Həştərxan vilayətinin Nərimanov rayonu bələdiyyə təsisatı ərazisində yaradılmış sənaye-istehsal tipli xüsusi iqtisadi zonada sənaye istehsal fəaliyyətinin həyata keçirilməsi haqqında saziş, Quba Turizm İnformasiya Mərkəzi ilə "Dərbənd 2000" Turizm Mərkəzi arasında turizmin inkişafı sahəsində birgə fəaliyyət haqqında saziş və Xaçmaz Turizm İnformasiya Mərkəzi ilə "Dərbənd 2000" Turizm Mərkəzi arasında turizmin inkişafı sahəsində birgə fəaliyyət haqqında saziş də var.
Bundan başqa, bir sıra şirkətlər arasında sənədlər imzalanıb.
Azərbaycanla Rusiya arasında ikitərəfli iqtisadi əlaqələr ilbəil genişlənməkdədir. Bu müxtəlif sahələri əhatə edir. Bu baxımdan sözügedən forumda əsasən investisiya və turizm yönümlü sənədlər imzalanmasını ekspertlər necə şərh edir?
Məsələyə münasibət bildirən ekspert Məhərrəm Zülfüqarlının sözlərinə görə, bunu bir sıra faktorlar şərtləndirir: "Məsələ ondadır ki, Azərbaycanla Rusiya arasında investisiya və turizm sahələrində əlaqələrin genişləndirilməsinə ehtiyac var. Yəni müşahidələr göstərir ki, həmin sahələrdə bir sıra işlərin görülməsinə ehtiyac var. Məsələn, Rusiya görür ki, Azərbaycan Türkiyə iqtisadiyyatına investisiya qoyuluşuna görə ciddi çəkiyə malikdir. O baxımdan istəyir ki, sərmayə onların da ölkəsinə gəlsin. Xüsusən də Rusiya üçün Dağıstana sərmayələrin cəlb olunması mühüm əhəmiyyət kəsb edir. Çünki adıçəkilən regionun inkişafı, öz növbəsində, orada mövcud olan digər problemlərin də həllinə müsbət təsir göstərəcək. O baxımdan Rusiya maraqlıdır ki, Azərbaycan sərmayəsi regiona yatırılsın. Başqa bir tərəfdən, bu il Azərbaycana çoxlu sayda turist gəldi. Ötən il Rusiya-Türkiyə münasibətlərində yaşanan gərginlik rus turistlərin ölkəmizə səfərlərini artırdı. Rus turistlərinin Azərbaycan barəsində təəssüratları müsbətə doğru dəyişdi. Görünür, bu və digər amillər turizm sahəsində bir sıra sənədlərin imzalanmasına təkan verib. Hər halda, iki dövlət arasında iqtisadi əlaqələrin genişlənməsi yaxşı haldır".
Vidadi ORDAHALLI
