Rəsul Cahangirli: "Ancaq bununla bağlı Rusiya təcrübəsini öyrənmək və lazım gələrsə, faydalanmaq olar"
Bakıda keçirilən Azərbaycan-Rusiya VII regionlararası forumunda bir sıra məsələlər müzakirə olunub. Rusiya Federasiyası İqtisadiyyat İnstitutunun direktoru Nikita İsayev "dəyirmi masa"da bir sıra təkliflərlə çıxış edib.
Onun sözlərinə görə, Rusiya kreditorların hüquqlarının qorunması ilə bağlı öz yanaşmasını təklif edə bilər. O bunu onunla əsaslandırıb ki, Azərbaycanda kreditorların hüquqlarının müdafiəsi olduqca zəifdir: "Azərbaycanda kreditorları qorumaq üçün zəif hüquqi sistemi var. Kiçik və orta sahibkarlar həmişə kreditlərin ödənilməsinin qarşısını almaq üçün bir yol axtarır. Çünki sistemin gücləndirilməsi üçün zəruri işlər görülməlidir. Bu da, öz növbəsində, vəziyyəti çoxetaplı edir".
Ümumiyyətlə, Rusiya İqtisadiyyat İnstitutunun direktoru N.İsayevin Azərbaycanda kreditorların hüquqlarının müdafiə sisteminin zəif olduğu barədə səsləndirdiyi fikirlər nə dərəcədə əsaslıdır?
Məsələyə münasibət bildirən ekspert Rəsul Cahangirlinin sözlərinə görə, səslənən iradlarla qismən razılaşmaq olar: "Məsələ ondadır ki, zaman-zaman kiçik və orta sahibkarlar kommersiya banklarından kredit götürərkən müəyyən çətinliklərlə üzləşib. Banklar kredit verərkən bunun müqabilində ikiqat dəyərdə girov tələb edib. Nəticədə krediti verə bilməyən sahibkar əmlakını itirməli olub. Başqa bir tərəfdən, sahibkar kredit alarkən bankların çoxsaylı şərtlərinə imza atır. Bir növ, dolayı da olsa, buna məcbur olur. Krediti ödəyə bilmədikdə məhkəmə çox asanlıqla bankın xeyrinə qərar çıxara bilir. Yəni kreditorlar öz hüquqlarını lazımi səviyyədə qoruya bilmir. Ancaq dövlət xətti ilə sahibkarlara verilən kreditlərə bunu aid etmək doğru deyil. Ona görə ki, Sahibkarlığın İnkişafına Dövlət Dəstəyi Fondu xəttilə verilən kreditlər daha sərfəlidir. Eyni zamanda, kreditorların üzərinə qoyulan öhdəliklər ağır deyil. Bu da onlara imkan verir ki, öz hüquqlarını daha yaxşı qoruya bilsin. O üzdən, səslənən tənqidi fikrə birmənalı prizmadan yanaşmaq olmaz. Ancaq bununla bağlı Rusiya təcrübəsini öyrənmək və lazım gələrsə, faydalanmaq olar". Vidadi ORDAHALLI
