Zakir Əhmədov: "Pivə bazarı ciddi şəkildə araşdırılmalı və yerli istehsalın nə dərəcədə tələbatı qarşılaya biləcəyi öyrənilməlidir"
Məlum olduğu kimi, noyabrın 1-də VII Azərbaycan-Rusiya regionlararası forumu keçirilib. Forum iştirakçıları turizm, sənaye, kənd təsərrüfatı və s. sahələr üzrə əməkdaşlıq əlaqələrinin inkişafı məsələlərini müzakirə edib. Forumda 12 sənəd imzalanıb.
Forum çərçivəsində Azərbaycan və Rusiya arasında əməkdaşlıq perspektivlərinə dair "dəyirmi masa"lar da keçirilib.
"Aqrar sahədə əməkdaşlığın genişləndirilməsinin başlıca istiqamətləri" adlı "dəyirmi masa"da hər iki ölkənin kənd təsərrüfatı sahəsində təcrübəsinə, tətbiq olunan qabaqcıl texnologiyalara və baş verən yeniliklərə, aqrar məhsulların keyfiyyətinin artırılmasına, ixracın genişləndirilməsinə, əməkdaşlığın inkişafına dair ətraflı fikir mübadiləsi aparılıb. Keçirilən "dəyirmi masa"da Rusiya İqtisadiyyat İnstitutunun direktoru Nikita İsayev bildirib ki, iki ölkə sahibkarlarının məlumat mübadiləsində problemlər var. Eyni zamanda, o, pivə istehsalı ilə bağlı bir sıra məqamlara toxunub. Onun fikrincə, yerli pivə istehsalını stimullaşdırmaq üçün idxal rüsumları artırılmalıdır.
Sözügedən məsələni dəyərləndirən ekspert Zakir Əhmədov buna bir neçə prizmadan yanaşdı: "Hesab edirəm ki, buna kortəbii getmək olmaz. Bəli, "Baltika" pivələri istehsal olunur. Yerli istehsalı qorumaq üçün müəyyən tədbirlər görülməlidir. Ancaq bunun iqtisadi tərəflərini də nəzərə almaq lazımdır. O mənada ki, istehlakçı hansı məhsula tələbat duyur, yerli istehsal mövcud tələbatı nə dərəcədə ödəyə bilər? Çünki digər pivə məhsulları ilə bağlı idxal rüsumlarının artırılması qiymətlərin daha da bahalaşmasına, tələb-təklif balansının pozulmasına gətirib çıxara bilər. Ona görə də buna birdən-birə getmək olmaz. Pivə bazarı ciddi şəkildə araşdırılmalı və yerli istehsalın nə dərəcədə tələbatı qarşılaya biləcəyi öyrənilməlidir. Burada bir sıra digər məsələlər də var ki, onları nəzərə almaq lazımdır. Ondan sonra bu sahədə hansısa qərarlar qəbul etmək olar". Vidadi ORDAHALLI
