Bu gün Bakıda Azərbaycan-Rusiya birgə əczaçılıq zavodunun təməlqoyma mərasimi keçirilib. Trend-in məlumatına görə, mərasimdə Azərbaycanın iqtisadiyyat naziri Şahin Mustafayev və Rusiyanın iqtisadi inkişaf nazirinin müavini Aleksandr Tsıbulski iştirak edib.
Zavod Pirallahı sənaye parkında inşa olunacaq.
Ş.Mustafayev deyib ki, Azərbaycan-Rusiya birgə əczaçılıq zavodu 2020-ci ildə tam istehsalat gücünə çatacaq. Pirallahı sənaye parkında zavodun təməlqoyma mərasimində iştirak edən nazir layihənin mərhələlər şəklində davam edəcəyini bildirib: “Bu ilin sonundan etibarən infrastruktur işləri, gələn ildən isə istehsalat sahələrinin tikintisi başlayacaq. Zavod tam istehsalat gücünə 2020-ci ildə çatacaq”.
Ş.Mustafayev indiyədək Azərbaycanda dərman istehsal olunmadığını, zavodun bu sferada ilk müəsissə olacağını deyib.
Zavodun tikintisinə 74 mliyon dollar sərmayə qoyulacaq və səhmlərinin 10 faizi “Azərbaycan İnvestisiya Şirkəti”nə, 45 faizi Rusiyanın “R-Farm”, qalan 45 faizi Azərbaycanın “Vita-A” şirkətlərinə məxsus olacaq.
Ş.Mustafayev bildirib ki, Azərbaycan yaxın vaxtlarda bir neçə əczaçılıq zavodunun tikintisinə başlayacaq. Onun sözlərinə görə, hazırda bir sıra ölkələrlə əczaçılıq sahəsində əməkdaşlıq üzrə danışıqlar aparılır.
Nazi əlavə edib ki, İran, Türkiyə və bir sıra Avropa ölkələri ilə birgə dərman istehsalı üzrə danışıqlar aparılır: "Düşünürəm ki, yaxın vaxtlarda Azərbaycanda bir neçə əczaçılıq zavodunun tikintisinə başlanacaq".
Ş.Mustafayevin sözlərinə görə, müxtəlif zavodların yaradılması ölkədə istehsal olunan dərman vasitələrinin siyahısını artıra bilər. Pirallahı sənaye parkında əczaçılıq zavodunun özülünün təməlqoyma mərasimində iştirak edən nazir bu zavodun Azərbaycanın dərman idxalından asılılığını əhəmiyyətli şəkildə azaldacağını bildirib.
Nazir qeyd edib: “Bu günə qədər Azərbaycanda dərman istehsalı olmayıb və biz 100 faiz dərman idxalatçısı hesab olunurduq. Bu zavodda 80 adda dərmanın istehsal olunması nəzərdə tutulur.”
Ş.Mustafayev ilkin olaraq zavoda 74 milyon vəsait qoyulacağını və iki ildən sonra Azərbaycanın dərman istehsal edə biləcəyini bəyan edib.
Rusiyanın “R-Farm” şirkətlər qrupunun direktorlar şurasının sədri, Rusiya Prezidenti yanında İqtisadi Şuranın üzvü Aleksey Repik isə jurnalistlərə açıqlamasında deyib ki, Azərbaycan qonşu ölkələrin, o cümlədən İranın əczaçılıq bazarına çıxış üçün çox maraqlı qovşaq ola bilər.
Pirallahı Sənaye parkında baş tutan mərasim zamanı A.Repik qeyd edib ki, bu zavodun məhsulları sayəsində Azərbaycan təkcə əczaçılıq sənayesini deyil, həm də ölkənin qeyri-xammal ixracat sahəsini inkişaf etdirə bilər.
Azərbaycan-Rusiya birgə əczaçılıq zavodunun tikintisi gələn ildən etibarən başlayacaq.
