Aydın Hüseynov: "Qardaş ölkənin yüngül sənayenin inkişaf etdirilməsi sahəsində böyük təcrübəsi var"
Azərbaycan və Türkiyə arasında ticarət dövriyyəsinin həcmini 15 milyard ABŞ dolları səviyyəsinə çatdırmaq ən böyük hədəflərdən biridir. Bunu mətbuata açıqlamasında Türkiyənin Azərbaycana yeni təyin edilmiş səfiri Erkan Özoral deyib.
Səfirin sözlərinə görə, Türkiyə ilə Azərbaycan arasında çox dərin qardaşlıq əlaqələri var: "Biz bu əlaqələri Azərbaycan müstəqillik əldə etdikdən bəri son 25 ildə hər keçən gün daha da möhkəmləndirdik. Diplomatlar olaraq, bizim üzərimizə düşən vəzifə bu sıx əlaqələri, ən yüksək rəsmi səviyyələrdə qurulmuş bu münasibətləri hər zaman daha da inkişaf etdirməkdir".
Diplomat vurğulayıb ki, Türkiyə ilə Azərbaycan 25 il ərzində Bakı-Tiflis-Ərzurum qaz boru kəməri, Bakı-Tiflis-Ceyhan neft boru kəməri kimi çox böyük layihələri birlikdə həyata keçirib: "Bundan sonra hədəfimizdə Bakı-Tiflis-Qars və TANAP kimi layihələrin reallaşdırılması dayanır. Bu işləri ən qısa vaxtda tamamlayaraq, bu layihələri istismara vermək bizim qarşımızda duran ən böyük tapşırıqlardan biridir. Eyni zamanda, ikitərəfli ticarət dövriyyəsini artırmaq, bu həcmi 2023-cü ildə 15 milyard dollar səviyyəsinə çatdırmaq qarşımızdakı ən böyük hədəflərdəndir. Təbii ki, yeni vəzifədəki fəaliyyət dönəmimdə bütün bunların gerçəkləşməsinə çalışacağam".
Qeyd edək ki, son məlumatlara görə, Azərbaycan-Türkiyə arasında ticarət dövriyyəsi 1,6 milyard dollardır. 2023-cü ildə Türkiyə Cumhuriyyətinin qurulmasının 100 ili tamam olacaq. O vaxta qədər iki ölkə arasında ticarət dövriyyəsini 15 milyard dollara çatdırmaq nə dərəcədə mümkündür? Sözügedən məsələni dəyərləndirən iqtisadçı, millət vəkili Aydın Hüseynovun fikrincə, bu mümkündür: "Hazırda Azərbaycanın ticarət dövriyyəsində Rusiya və Türkiyə ən önəmli yerləri tutur. Bu baxımdan, səfirin qeyd etdiyi kimi, Azərbaycanla Türkiyə arasında ticarət dövriyyəsinin 2023-cü ildə 15 milyard dollara çatdırılması realdır. TANAP və TAP layihələrində hər iki ölkənin yaxından iştirakı, Türkiyənin bu layihədə yalnız tranzit ölkə kimi deyil, bu layihə ətrafında formalaşdırılan digər infrastrukturlarda da rol alması ticari, iqtisadi, siyasi əlaqələrimizi daha da inkişaf etdirəcək. Bundan başqa, Azərbaycan iqtisadiyyatın şaxələndirilməsi istiqamətində başlıca vəzifə kimi sənayeni, o cümlədən yüngül sənayeni daha da inkişaf etdirməyi qarşısına məqsəd qoyub. Türkiyənin də yüngül sənayenin inkişaf etdirilməsi sahəsində böyük təcrübəsi var. Bu təcrübənin öyrənilməsi və tətbiqi, o cümlədən Azərbaycanda pambıqçılığın, ipəkçiliyin, mahudçuluğun inkişaf etdirilməsi istiqamətində işlər görülməkdədir. Bu sahədə biz Türkiyəni özümüz üçün böyük bazar hesab edirik. Eləcə də turizm sahəsində. Hər kəsə məlumdur ki, Türkiyənin dövlət büdcəsində turizmdən gələn gəlir böyük rol oynayır. Bu sahədə də Türkiyə ilə əməkdaşlığımızın inkişaf etdirilməsi nəzərdə tutulur. Ümumilikdə bütün sahələrin inkişaf etdirilməsini, əlaqələrimizin daha da möhkəmləndirilməsini əsas götürsək, gələcəkdə ölkələrimiz arasında ticarət dövriyyəsinin 15 milyard dolları əhatə edəcəyini, hətta bu məbləği də keçəcəyini söyləmək olar".
Vidadi ORDAHALLI
