Zakir Əhmədov: "Hazırda 24 rayonda pambıqçılığın inkişafı diqqət mərkəzindədir"
Bu günə olan vəziyyət görə, Azərbaycanda 44 min tondan çox pambıq tədarük edilib. Bu barədə Dövlət Statistika Komitəsi məlumat yayıb. Məlumata görə, bu, ötən ilin eyni dövrü ilə müqayisədə 2,8 dəfə çoxdur.
Son illər Azərbaycanın regionlarında yaradılmış müasir infrastruktur, aqrar sektorun zəruri texnika ilə təminatının gücləndirilməsi, yeni suvarma sistemlərinin qurulması, kənd təsərrüfatı məhsullarının istehsalının artırılması, toxumçuluğun inkişafına göstərilən diqqət qeyri-neft sektorunda canlanma yaradıb. Region sakinləri üçün gəlirli sahə olan pambıqçılığın, tütünçülüyün və baramaçılığın inkişafı, bu sahələrdə məhsuldarlığın artırılması üçün geniş imkanlar mövcuddur.
Pambıqçılıq respublikamızda daha çox işçi tələb edən, valyuta gətirən gəlirli kənd təsərrüfatı sahələrindən biri olub. Ancaq ötən əsrin 90-cı illərində, bir sıra sahələr kimi, pambıqçılığın da inkişafı unuduldu. Nəticədə ötən il cəmi 30 ton pambıq yetişdirilib.
Ancaq cari ilin əvvəlində Prezident İlham Əliyevin təşəbbüsü ilə dövlət səviyyəsində görülən bir sıra tədbirlər artıq bu sahədə müsbət dinamikanın yaranmasına öz təsirini göstərir. Məsələyə münasibət bildirən ekspert Zakir Əhmədovun sözlərinə görə, Azərbaycanda qeyri-neft sektorunun inkişafının diqqət mərkəzində saxlanması pambıqçılığın inkişafına da öz müsbət təsirini göstərir: "Çünki bu, valyuta gətirən, bazarı daha tez tapılan məhsuldur. Prezident İlham Əliyevin sədrliyi ilə Nazirlər Kabinetinin 2016-cı ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında pambıqçılığın inkişafı ilə əlaqədar qarşıya konkret vəzifələr qoyuldu. Ölkə başçısının pambıqçılığın əhalinin məşğulluğunun təmin edilməsində vacib sahələrdən biri olduğunu vurğulaması və verilən tapşırıqlar əsasında pambığın alış qiymətinin artırılması bu sahənin yenidən canlanmasına təkan verib. Ölkə başçısının tapşırığından sonra hazırda 24 rayonda pambıqçılığın inkişafı diqqət mərkəzindədir. Qarşıya qoyulan vəzifələr yaxın gələcəkdə bu sahədə daha qətiyyətli addımların atılacağından xəbər verir. Son bir neçə ay ərzində görülmüş tədbirlər nəticəsində 52 min hektarda pambıq əkini təmin edilib. Ölkədə pambıqçılığın inkişaf perspektivləri isə daha genişdir. Nazirlər Kabinetinin sonuncu iclasında ölkə başçısı pambıqçılıqda yeni texnologiyaların tətbiqi sayəsində məhsuldarlığın artacağına əminliyini bildirib. Bütün bunlardan çıxış edərək hesab edirəm ki, pambıqçılığa maraq daha da artacaq". Vidadi ORDAHALLI
