Natiq Cəfərli: "Məsuliyyət bölgüsü aparılıb yeni qaydalar tətbiq olunacaqsa və kredit borclarının həlli yolunda müəyyən addımlar atılacaqsa, pozitiv nəticə əldə olunar"
Uzun müddətdir "Kredit büroları haqqında" qanun layihəsi həm mediada, həm də Milli Məclis üzvləri tərəfindən müzakirə olunurdu. "Kredit büroları haqqında" qanun layihəsinin özəlliyi ondan ibarətdir ki, bu, problemli kreditlərin qarşısını alacaq.
Parlamentin ötən iclasında adıçəkilən qanun layihəsi II və III oxunuşda səsə qoyularaq qəbul edilib. Qanunun məqsədi fiziki və hüquqi şəxslərə öz maliyyə öhdəliklərinin icrası barədə uzunmüddətli məlumat bazasının formalaşdırılması yolu ilə maliyyə xidmətlərinə çıxış imkanlarının yaxşılaşdırılması, borc münasibətlərində maliyyə intizamının möhkəmləndirilməsi və ölkədə maliyyə sisteminin sabitliyinin təmin edilməsidir.
Qəbul olunan "Kredit büroları haqqında" qanun barədə "Bakı-Xəbər"ə açıqlama verən iqtisadçı-ekspert Natiq Cəfərli qeyd etdi ki, bununla problem həll olunmur: "Bankların ümumi vəziyyəti, əhalinin alıcılıq qabiliyyəti, gəlirlərin səviyyəsi kimi amillər kreditlərin geri dönüşündə əsas rol oynayır. Qəbul olunan qanun nə qədər yaxşı olsa belə, o işlək olmayacaqsa, müsbət nəticə gözləyə bilmərik. Statistik rəqəmlərə əsasən, problemli kreditlərin həcmi bu ilin doqquz ayında 2 dəfədən çox artıb. Ölkədə yaşanan iki devalvasiyadan sonra dollarla götürülən kreditlərin vəziyyəti mənfiyə doğru dəyişdi. Ölkədə iqtisadi aktivlik və gəlirlilik zəiflədi. Bütün bu və digər səbəblər problemli kreditlərin həcminin artmasına təsir edir".
Həmsöhbətimizin bildirdiyinə görə, qəbul edilən qanuna görə, kredit büroları yaranacaq. Yaranacaq kredit bürolarında müəyyən təklif hazırlanacaqsa və məsuliyyət bölgüsü olacaqsa, müsbət nəticə gözləmək olar: "Bəllidir ki, hazırda bütün məsuliyyət vətəndaşın üzərindədir. Qanunun təkmilləşdirilməsi istiqamətində addımlar atılmalıdır. Məsuliyyət bölgüsü aparılıb yeni qaydalar tətbiq olunacaqsa və kredit borclarının həlli yolunda müəyyən addımlar atılacaqsa, pozitiv nəticə əldə olunar".
Günel CƏLİLOVA
