İlham Şaban: "Səudiyyə Ərəbistanı ilə Rusiya arasında bu istiqamətdə aparılan görüşdəki müzakirənin detalları mətbuata sızdırılmışdı"
Avstriyanın paytaxtı Vyanada OPEC-ə üzv ölkələrin toplantısı keçirilib. Baş tutan son toplantı 11 saatdan çox davam edib. Neft hasilatının dondurulmasına dair aparılan müzakirələr zamanı yekun qərarlar qəbul edilməyib. İraq və İran nümayəndələri bəyan edib ki, OPEC onların hasilat səviyyəsini düzgün qiymətləndirmir. Tehran və Bağdad neft hasilatının dondurulması sazişinə qoşulmaq niyyətində deyil.
Qeyd edək ki, Vyanada baş tutan sonuncu görüşdə OPEC-ə üzv olmayan, lakin neft hasilatının dondurulması ilə bağlı danışıqlara qoşulmağa razılıq verən ölkələrin nümayəndələrinin iştirakı planlaşdırılıb.
OPEC-in son görüşü dünya bazarında neftin qiymətinə hansı formada təsir edəcək?
Neft məsələləri üzrə ekspert İlham Şaban qəzetimizə açıqlamasında bildirdi ki, OPEC-in Vyana görüşündə konkret nəticənin əldə edilməyəcəyi proqnozlaşdırılırdı:
"Çünki OPEC üzvü olmayan ölkələrin böyük əksəriyyəti hasilatı azaltmağı planlamırdı. Bu özünü görüşdən öncəki birja qiymətlərinə olan təsirdə də aydın büruzə verdi. Hələ görüş başlamamış qiymət bir barrel üçün 52-dən 50-yə endi. Görüş başa çatandan sonra isə qiymət 49-a düşdü. Bunun da səbəbi bəllidir. Çünki dünyanın ən böyük neft ixracatçıları olan Səudiyyə Ərəbistanı ilə Rusiya arasında bu istiqamətdə aparılan görüşdəki müzakirənin detalları mətbuata sızdırılmışdı. Bəlli oldu ki, Rusiya hətta hasilatın 4 faiz civarında azaldılmasına belə etiraz edib. Görüş zamanı İran və İraqın özləri üçün əlavə güzəşt tələb etməsi məsələni bir qədər də çətinləşdirdi və məlum oldu ki, OPEC üzvü olan ölkələr arsında çaxnaşma yaranıb. İraq hazırda neft hasilatını daha da artırmağı düşünür. Çünki qeyri-stabillik səbəbindən uzun müddətdir həmin ölkə neftdən qazanc götürə bilmir. Çıxış yolunu hasilatı artırmaqda görürlər. Hesab edirəm ki, stabilliyin daha yaxşı təmin ediləcəyi halda, İraq daha çox neft hasil etməyi planlayır. Rusiyaya gəldikdə isə, onlar bu sırada rekord vurur. Artıq Rusiyanın hasilatı 11 milyon barreli keçib. Yaranmış vəziyyət neftin uzun müddət bahalaşmayacağını diqtə edir".
Məhəmmədəli QƏRİBLİ
