Zakir Əhmədov: "Bu məqsədlə Azərbaycan həm yeni xəttin çəkilişi ilə əlaqədar, həm də ölkənin..."
1995-2016-cı illərdə Azərbaycan tərəfindən Gürcüstana 3,4 milyard dollar investisiya yatırılıb. 2015-2016-cı illərdə Gürcüstana investisiya qoyuluşu üzrə Azərbaycan lider olub.
Bu barədə Azərbaycanın iqtisadiyyat naziri Şahin Mustafayev Tiflisdə Gürcüstanın baş nazirinin birinci müavini, iqtisadiyyat və davamlı inkişaf naziri Dmitri Kumsişvili ilə görüşündə bildirib: "Hazırda Gürcüstanda 250-dən çox Azərbaycan şirkəti fəaliyyət göstərir, Azərbaycanda isə artıq 243 Gürcüstan şirkəti qeydiyyatdan keçib. "SOCAR Georgia" son bir neçə ildə Gürcüstanda ən çox vergi ödəyən şirkətdir".
Bu ilin ikinci yarısında Azərbaycan Gürcüstan iqtisadiyyatına 146 milyon ABŞ dolları həcmində birbaşa xarici investisiya yatırıb. Bu, ötən rüb qonşu ölkənin iqtisadiyyatına yatırılan məcmu investisiyanın 33 faizinə bərabərdir. Bu göstərici ilə Azərbaycan Gürcüstan iqtisadiyyatına sərmayə qoyan ölkələr sırasında birinci yerdədir.
Azərbaycandan sonra ikinci yerdə 64 milyon dollarla (14 %) Böyük Britaniya, üçüncü yerdə isə 36 milyon dollarla (8 %) Çexiya qərarlaşıb.
Qeyd edək ki, bu ilin I rübündə Azərbaycan Gürcüstana 137 milyon dollar yatırıb. Son on ildə Azərbaycanın Gürcüstan iqtisadiyyatının inkişafında rolu daha qabarıq formada özünü göstərir. Yəni Azərbaycan təkcə bu ölkədə neft-qazla bağlı sahələrə sərmayə qoymur. Eyni zamanda ölkənin nəqliyyat sektoruna da investisiya qoyur.
Sözügedən məsələ ilə bağlı fikirlərini "Bakı-Xəbər"lə bölüşən ekspert Zakir Əhmədovun sözlərinə görə, Azərbaycanın sərmayə qoyuluşunda öncül yerdə qərarlaşması bir sıra faktorlarla bağlıdır: "Məsələ ondadır ki, Azərbaycan neft-qaz resurslarının əsas hissəsini məhz Gürcüstan vasitəsilə dünya bazarına çıxarır. Bununla yanaşı, qonşu ölkənin açıq dənizə birbaşa çıxış imkanı olduğuna görə Türkiyə və Avropa ölkələri ilə ticarət əlaqələri Gürcüstan üzərindən həyata keçirilir. Ölkədə enerji daşıyıcıları infrastrukturunun yenilənməsində SOCAR şirkətinin qoyduğu sərmayələr mühüm rol oynayır. Bütün bunlarla yanaşı, son illər qonşu ölkədə həyata keçirilən ciddi islahatlar sərmayələri cəlb etmək üçün münbit şərait yaradıb. İki yüzdən çox Azərbaycan şirkətinin ölkədə fəaliyyət göstərməsi səbəblərindən biri də bununla bağlıdır. Son dövrlər Gürcüstan iqtisadiyyatına qoyulan investisiyaların əsas hissəsini nəqliyyat sektoru təşkil edir. Bildiyiniz kimi, Bakı-Tiflis-Qars dəmir yolu layihəsi artıq yekunlaşmaq üzrədir. Bu məqsədlə Azərbaycan həm yeni xəttin çəkilişi ilə əlaqədar, həm də ölkənin dəmir yolu infrastrukturunun yenilənməsinə böyük həcmdə sərmayə yatırıb. Eyni zamanda, 1 faizlə 400 milyon dollar kredit verib. Bütün bunlar Azərbaycanın Gürcüstan iqtisadiyyatına ən çox sərmayə qoyan ölkələr arasında birinci olmasına gətirib çıxarıb".
Vidadi ORDAHALLI
