Vüqar Bayramov: "İnvestisiyaların cəlb olunması burada əsas hədəf olaraq nəzərdə tutulub"
Bu gün Azərbaycan dünyada nümunəvi inkişaf modelinə malik olan bir ölkə kimi tanınır. Davamlı inkişaf nəticəsində respublikamız Cənubi Qafqazın lider dövləti səviyyəsinə yüksəlib. Ölkə, eyni zamanda, müntəzəm olaraq qlobal miqyasda yeni-yeni əməkdaşlıq təşəbbüsləri ilə çıxış edir ki, bunun da hesabına iqtisadi əlaqələr bir az da genişlənir.
Məlum oduğu kimi, Bakının Ələt limanında azad ticarət zonasının yaradılması barədə sərəncam verilib. Zonanın gələn ildən tam fəaliyyət göstərəcəyi gözlənir. Bununla da Ələtdəki azad ticarət zonası tipli xüsusi iqtisadi zona dünyanın Dubay, Honkonq, Şanxay, Sinqapur kimi nəhəng nəqliyyat-logistika mərkəzinə çevriləcək.
Limanın sahəsi 400 hektardır və bu ərazinin 100-115 hektarında azad iqtisadi zona yaradılacaq. Bu zonanın yaradılmasında 100-115 hektar ərazi kifayət etməzsə, o zaman Bakı limanının sahəsi genişləndiriləcək.
Ələt qəsəbəsində azad ticarət zonasının yaradılmasının iqtisadi əsaslandırılması, inkişaf konsepsiyası, infrastrukturu və idarə olunması, eləcə də həyata keçiriləcək sahibkarlıq fəaliyyətinin növləri, habelə onların xüsusiyyətləri ilə bağlı təkliflərin hazırlanması istiqamətində işlər görülür. Bütün bunlar öz yerində. Ancaq Azərbaycanda azad ticarət zonaları haqqında ayrıca qanun hələ yoxdur, daha doğrusu, MM-də təsdiqlənməyib. Bunsuz azad ticarət zonaları fəaliyyət göstərə biləcəklərmi? Sözügedən məsələyə aydınlıq gətirən iqtisadçı-ekspert Vüqar Bayramovun sözlərinə görə, Azərbaycanda iqtisadi zonaların təşkili haqqında qanun bir neçə il əvvəl qəbul olunub: "Sözügedən məsələ qanunvericiliklə tənzimlənir. Bu, xüsusi iqtisadi zonaların yaradılması və idarə edilməsi ilə bağlı hüquqi və iqtisadi münasibətləri tənzimləyir. Həmin zonalarda sahibkarlıq fəaliyyətinin təşkili qaydalarını müəyyənləşdirir. Azad ticarət zonalarının yaradılması bilavasitə ölkə başsçısının qeyri-neft sektorunun inkişafı, ölkəmizi Avrasiya regionunda nəqliyyat və logistika mərkəzinə çevirmək siyasətinin mühüm hissəsidir. İqtisadi zonalar üçün ən vacib amil xarici dövlətlərə çıxış imkanıdır. Yeni layihəyə əsasən, Azərbaycan xarici dövlətlərə çıxış imkanı qazanacaq. Yeni yaradılacaq iqtisadi zona daha çox nəqliyyat, logistika zonasının formalaşmasına xidmət edir. İnvestisiyaların cəlb olunması burada əsas hədəf olaraq nəzərdə tutulub. Belə bir iqtisadi zonanın yaradılmasının üstünlüyü ondan ibarətdir ki, Azərbaycan tranzit ölkə olaraq öz imkanlarını genişləndirə biləcək və ölkə ərazisinə daha çox yükdaşımalara nail olacaq".
Vidadi ORDAHALLI
