Mustafa Abbasbəyli: "Müəyyən şirkətlərin sığorta bazarını tərk etməsinə baxmayaraq, bu sahədə inkişafın qeydə alınması sevindiricidir"
Açıqlanan rəsmi məlumatlara əsasən, Azərbaycanın sığorta bazarında artım qeydə alınıb. Maliyyə Bazarlarına Nəzarət Palatasının yaydığı məlumata əsasən, bu ilin 9 ayı ərzində ölkənin 25 sığortaçısı tərəfindən 390 milyon manat həcmində sığorta haqqı toplanıb. Bu göstərici ötən ilin müvafiq dövrü ilə müqayisədə 51 milyon manat və ya 15,1 faiz çoxdur.
Palatanın yaydığı məlumatda qeyd olunur ki, bu dövr ərzində sığortaçıların həyata keçirdiyi sığorta ödənişlərinin məbləği 167 milyon manat təşkil edib ki, bu da ötən illə nisbətdə 31 % çoxdur.
Sığorta sahəsində qeydə alınan 15 faizlik artım hansı sahələrdə daha çox müşahidə olunur? Məsələ ilə bağlı sığorta sahəsi üzrə ekspert Mustafa Abbasbəyliyə müraciət etdik. O, "Bakı-Xəbər"ə açıqlamasında qeyd etdi ki, ötən illə müqayisədə sığortanın bir çox sahələrində artım yaşanıb: "Əsas artım həyat və nəqliyyat vasitələrinin sığortasında qeydə alınıb. Digər sığorta növlərində də artım müşahidə olunub. Ancaq qeyd etdiyim iki sahədə daha çox artım baş verib".
M.Abbasbəylinin sözlərinə görə, könüllü sığorta sahəsində də inkişaf qeydə alınır: "Həyat sığortası könüllü sığorta növünə aiddir. Bu sığorta növündə, demək olar ki, hər il tədricən artım müşahidə olunur".
Tibbi və əmlak sığortasına gəlincə, həmsöhbətimizin sözlərinə görə, bu sahələrdə yüksək artım qeydə alınmayıb: "Bəllidir ki, bəzi şirkətlərin fəaliyyəti dayandırılıb. Bu səbəbdən də qeyd etdiyim sahələrdə yüksək artım qeydə alınmayıb".
Ekspert onu da əlavə etdi ki, mülki məsuliyyət yönündə sığorta növləri üzrə artım müşahidə olunmayıb: "Könüllü mülki məsuliyyət yönündə sığorta sahəsində artım yaşanmayıb. O cümlədən, istehsalatda bədbəxt hadisələrin sığortası növündə də heç bir dəyişiklik yoxdur. Bu sahədə vəziyyət ötən illə müqayisədə eynidir".
M.Abbasbəylinin sözlərinə görə, insanların sığorta sahəsinə meyli ildən-ilə artır. Sığorta sahəsi ilə bağlı əhalinin maarifləndirilməsi bu sahənin inkişafına səbəb olur: "Son 10-15 ildə sığorta bazarında artım müşahidə olunur. Onu da qeyd etmək lazımdır ki, müəyyən şirkətlərin sığorta bazarını tərk etməsinə baxmayaraq, bu sahədə inkişaf yaşanır".
Günel CƏLİLOVA
