Vüqar Bayramov: "Qorunan əmanətlərin faizi 18-ə yüksələrsə, bu, birmənalı şəkildə, depozit portfelinin strukturuna təsir edəcək"
Qorunan əmanətlərin faiz dərəcəsinə yenidən baxıla bilər. Söhbət banklara manatla qoyulan depozitlərdən gedir. Bu barədə Əmanətlərin Sığortalanması Fondunun rəhbəri Azad Cavadov fins.az-a açıqlamasında deyib.
Onun sözlərinə görə, hər rübün sonunda əsas faktorlar nəzərə alınaraq Fondun Himayəçilər Şurası bununla bağlı müzakirə aparır. Daha sonra qorunan əmanətlər üzrə faiz dərəcəsi ilə bağlı qərar qəbul edilir. O bildirib ki, əmanətlərin faiz dərəcəsi ilə bağlı növbəti müzakirə 3-cü rübün nəticələri açıqlanandan sonra aparılacaq. Nəticədə faiz dərəcəsinin artırılıb-artırılmayacağı məlum olacaq.
Qeyd edək ki, hazırda qorunan manat əmanətləri üzrə faiz dərəcəsi 15 %, dollar əmanətləri üzrə 3 % təşkil edir.
Ekspertlərin bir qismi manatla qoyulan əmanətlərin faizlərinin artırılmasını təklif edir.
İqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, o bir neçə ay öncə manatla yerləşdirilən əmanətlərin faiz dərəcəsinin artırılmasını təklif edib: "Hələ o zaman 12 faizlə əmanətlər yerləşdirilirdi. Və o vaxt mən təklif etmişdim ki, manat əmanətləri mərhələli şəkildə 18 faizə çatdırılsın. Qorunan əmanətlərin faiz dərəcəsi artarsa, bu, milli valyutanın yığımına təsir edəcək. Bəllidir ki, bu gün dollarla depozitlərin faizi aşağıdır. Depozit qoymaq istəyənlər aylıq faizi və ondan əldə olunan gəliri nəzərə alıb manatla qoymağa üstünlük verəcək".
İqtisadçının fikrincə, manatla qoyulan əmanətlərin 18 faizə çatdırılmasına ehtiyac var. Qorunan əmanətlərin faizi 18-ə yüksələrsə, bu, birmənalı şəkildə, depozit portfelinin strukturuna təsir edəcək.
Həmsöhbətimizin sözlərinə görə, Əmanətlərin Sığortalanması Fondu manat əmanətlərinin faiz məsələsinə yenidən baxmalıdır: "Qorunan əmanətlərin 18 faizə çatdırılması ölkə iqtisadiyyatına müsbət təsir edər. Nəzərə almaq lazımdır ki, bu baş verərsə, manat yığımlarının həcmi arta bilər".
Günel CƏLİLOVA
