Sahib Məmmədov: "Bu da bütün üzv dövlətlərin mənafeyinə uyğundur"
İslam Əməkdaşlıq Təşkilatı (İƏT) Xarici İşlər Nazirləri Şurasının oktyabrın 18-19-da Özbəkistanın paytaxtı Daşkənd şəhərində keçirilmiş 43-cü sessiyasında mənzil-qərargahı Bakı şəhərində yerləşəcək İƏT Əmək Mərkəzinin Nizamnaməsi təsdiq edilib.
Bu mərkəzin yaradılması barədə təklif İƏT-ə üzv dövlətlərin əmək nazirlərinin 2013-cü ilin 25-26 aprel tarixlərində Bakı şəhərində keçirilmiş ikinci konfransı çərçivəsində Azərbaycan Respublikası Prezidenti İlham Əliyev tərəfindən irəli sürülüb. Həmin tədbirdə dövlət başçısı Azərbaycanda işsizliyin aradan qaldırılması istiqamətində aparılan islahatlar və qazanılan uğurlu təcrübənin digər dövlətlər üçün maraqlı olacağını qeyd edib, İƏT-in Bakıda belə bir qurumunun yaradılmasının təşkilata üzv dövlətlər arasında birliyi daha da möhkəmləndirə biləcəyini vurğulayıb. Təklif konfrans iştirakçıları tərəfindən yüksək dəyərləndirilib və yekdilliklə dəstəklənib.
Nizamnaməyə əsasən, İƏT Əmək Mərkəzinin mənzil-qərargahı Bakı şəhərində yerləşəcək. Nizamnamə 10 üzv dövlət tərəfindən ratifikasiya edildikdən sonra qüvvəyə minəcək. İƏT-in ixtisaslaşmış qurumu olacaq mərkəzin əsas məqsədi əmək, məşğulluq, sosial müdafiə və insan kapitalının inkişafı sahəsində üzv dövlətlərin səylərinin birləşdirilməsi, üzv dövlətlərin müvafiq qurumlarının və digər aidiyyəti İƏT təşkilatlarının fəaliyyətinin əlaqələndirilməsi, üzv dövlətlərdə əmək şəraitinin yaxşılaşdırılması, sosial tərəfdaşlığın gücləndirilməsi, layiqli əməyin tətbiqi, məşğulluq imkanlarının genişləndirilməsi və dayanıqlı sosial müdafiə sisteminin formalaşdırılmasını təşviq etməkdən ibarətdir.
Maraqlıdır, ekspertlərin yeni yaranan quruma münasibəti necədir?
Məsələyə münasibət bildirən Əmək Hüquqlarının Müdafiəsi Liqasının rəhbəri Sahib Məmmədovun sözlərinə görə, belə bir mərkəzin yaradılması müəyyən əhəmiyyət kəsb edir: "Belə bir məsələdə razılığın əldə olunması əlbəttə ki, normal və təqdirəlayiq haldır. O mənada ki, Mərkəz əmək miqrasiyası ilə bağlı təcrübə mübadiləsinin aparılmasında koordinasiya rolunu oynaya bilər. Eyni zamanda, əməyin təşkili məsələsində qarşılıqlı mübadilə məsələləri burada öz əksini tapacaq. Bir sıra digər məsələlərdə əməkdaşlıq edilməsi nəzərdə tutulub. Nəzərə almaq lazımdır ki, Azərbaycan İƏT-in üzvüdür. Ümumi götürəndə əmək miqrasiyası məsələləri əməkdaşlıq çərçivəsində tənzimlənə bilər. Əmək sahəsində təcrübə mübadiləsinə baxacaqlar. Hər halda Əmək Mərkəzi vasitəsilə bu sahədə əlaqələrin genişləndirilməsi gözlənir. Bu da bütün üzv dövlətlərin mənafeyinə uyğundur".
Vidadi ORDAHALLI
