Pərviz Heydərov: "Ölkəmizdə dövriyyəyə buraxılan istiqrazlar üzrə gəlirlilik təklifi ehtiyatlı xarakter daşıdığından, demək olar ki, bazara uyğun sayılır"
25 oktyabr 2016-cı il tarixində Bakı Fond Birjasında Maliyyə Nazirliyinin AZN nominallı, AZ0102018519 ISIN kodlu, 182 gün tədavül müddətli, 17 000 000 AZN həcmində qısamüddətli dövlət istiqrazlarının yerləşdirilməsi üzrə hərrac keçirilib. Bakı Fond Birjasının məlumatına əsasən, hərrac zamanı 6 investor tərəfindən 11 sifariş təqdim olunub. Sifarişlərin nominal üzrə ümumi məbləği 23,338,100.00 AZN təşkil edir.
Qeyd edək ki, sifarişlər 90.0000 AZN (22.4063 %) və 93.0700 AZN (15.0154 %) qiymət intervalında təqdim edilib.
Hərracın yekunları üzrə bağlanmış əqdlərin minimum qiyməti 90.9775 AZN (19.9989 %) orta ölçülmüş qiyməti 91.5657 (18.5750 %) təşkil edib.
Dövlət istiqrazlarına tələbin təklifi üstələməsi barədə fikir bildirən İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov "Bakı-Xəbər"ə açıqlamasında qeyd etdi ki, istiqrazlar borc öhdəliyidir. Bunların dövriyyəyə buraxılması nəğd pul kütləsini cəlb etmək məqsədi daşıyır: "Bu mənada istər Maliyyə Nazirliyinin, istərsə də SOCAR-ın bu il ərzində bu məsələyə xüsusi diqqət yetirməsi təsadüfi olmadı. Məlumdur ki, neftdən gələn gəlirlərimiz azalıb. Üstəlik, bank sektoru faktiki iflic vəziyyətindədir. Belə bir şəraitdə isə dövriyyədən kənarda külli miqdarda nəğd vəsaitlər mövcuddur. Odur ki, bunu cəlb etmək real olaraq həyati əhəmiyyət daşıyır. Ancaq burada bəzi nüanslar var. O da bundan ibarətdir ki, ölkəmizdə qiymətli kağızlar bazarı istənilən səviyyədə inkişaf etməyib. İstiqrazların əldə edilməsinə və ümumiyyətlə, qiymətli kağızlara vəsait yatırılmasına əksər qurumlar və şəxslər maraqlı deyil. O səbəbdən ki, bunu risq sayanlar var. Bununla belə, hazırda şərait elədir ki, alternativ variantlar da məhduddur. Belə ki, investisiya imkanları, banklar üzrə gəlirlilik şəraiti dar çərçivədədir. Odur ki, bu sahədə stimullaşdırıcı tədbirlərə ehtiyac var.
Bütün bu qeyd olunanlar baxımından, məsələn, bilavasitə SOCAR-ın istiqrazlar əməliyyatı olduqca yerinə düşdü. Bu, sahibkarlarda və fiziki şəxslərdə maraq yaratdı. Tendensiyanın avtomatik olaraq Maliyyə Nazirliyinin də istiqrazlarında özünü göstərəcəyi gözlənilən idi. Hesab edirəm ki, bizdə getdikcə qiymətli kağızlara maraq artacaq. Bunu tezliklə müşahidə edə biləcəyik.
Lakin burada ən mühüm şərtlərdən biri də sözsüz ki, təminat məsələsidir. Belə ki, hələlik ölkəmizdə dövriyyəyə buraxılan istiqrazlar üzrə gəlirlilik təklifi bu baxımdan olduqca ehtiyatlı xarakter daşıdığından, demək olar ki, bazara uyğun sayılır. Fikrimcə, məhz bu amil də istiqrazlara tələbin getdikcə genişlənməsi ilə nəticələnəcək".
Günel CƏLİLOVA
