Çingiz Fərəcov: "Kənd Təsərrüfatı Nazirliyinin risqlərin yumşaldılması ilə bağlı mövqe ortaya qoyması düzgün addımdır"
Aqrar sığortanın təkmilləşdirilməsi ilə bağlı xüsusi tədbirlər planı hazırlanacaq. Tədbirlər planı haqqında media nümayəndələrinə açıqlama verən kənd təsərrüfatı nazirinin müavini Seyfəddin Talıbov bildirib ki, Maliyyə Bazarlarına Nəzarət Palatası Azərbaycanda aqrar sığortanın təkmilləşdirilməsi istiqamətində işlərə başlayıb:
"Kənd təsərrüfatı dünyada ən risqli sahələrdən biridir. Bu sahədə olan risqlərin yumşaldılması və fermerlərə dəyən zərərin ödənilməsini təmin etmək üçün Kənd Təsərrüfatı Nazirliyi Maliyyə Nazirliyi ilə birgə xüsusi qanun layihəsi hazırlayaraq hökumətə təqdim edib. Artıq həmin sənədə Milli Məclisdə baxılır.
Qanun qəbul edildikdən sonra bütövlükdə bu sahənin inkişaf etdirilməsi üçün dövlət tərəfindən həyata keçiriləcək stimullaşdırıcı tədbirlərin siyahısı müəyyənləşdirilərək bu işlərə başlanacaq".
Məsələ barəsində fikrini öyrəndiyimiz aqrar sahə üzrə ekspert Çingiz Fərəcov "Bakı-Xəbər"ə açıqlamasında maraqlı məqamlara toxundu: "25 ildən artıqdır Azərbaycan müstəqil dövlətdir. Bu müddət ərzində kənd təsərrüfatı məhsullarının sığortalanması məsələsi çoxdan həll olunmalı idi. İndiyə qədər bu məsələ həll olunmayıb. Qonşu Gürcüstanda aqrar məhsullar sığortalanır. Bəllidir ki, aqrar sahəyə mənfi təsir göstərən fövqəladə hadisələr baş verə bilər. Həddindən artıq şaxtanın olması, əkin yerlərini selin aparması, ildırım, yanğın kimi təbii hadisələr kənd təsərrüfatına təsir edir. Təbii fəlakət zamanı fermer və sahibkarlara dəyən zərər ödənilməlidir. Lakin sığorta şirkətləri bu məsələyə maraq göstərmir. Sığorta şirkətlərinin bu sahədən uzaq durmasının səbəbi risqlərdir. Kənd Təsərrüfatı Nazirliyinin risqlərin yumşaldılması ilə bağlı mövqe ortaya qoyması düzgün addımdır. Elə etmək lazımdır ki, kənd təsərrüfatı sahəsində çalışanlara dəyən zərər ödənilsin. Məlumat üçün bildirim ki, bu il həddindən artıq pomidor əkilmişdi. Ancaq iyun ayının əvvəlində yağan yağışlar nəticəsində pomidor sahələri batdı. Həmin ərəfədə satışda pomidor az və qiyməti yüksək olurdu. Bu kimi problemlərin həll olunması üçün aqrar sahə sığortalanmalıdır".
Həmsöhbətimiz hesab edir ki, aqrar sahənin təkmilləşdirilməsi üçün kənd yerlərində təbliğat işləri aparmaq lazımdır: "İnsanların sığorta sahəsinə inamı artmalıdır. Onu da deyim ki, respublika ərazisinə damazlıq heyvanlar gətirilir. Damazlıq heyvanlar aqrolizinq şirkəti tərəfindən sığortalanır. Lakin sığorta şirkətləri heyvan tələf olan zaman sahibkarlara dəyən zərəri ödəmir. Ölən heyvanlara görə sığorta ödənişi isə xüsusi meyarlarla təyin olunmalıdır. Yəni hər tələf olan heyvan üçün sahibkara ödəniş etmək düzgün olmaz".
Günel CƏLİLOVA
