Zakir Əhmədov: "İşi elə təşkil etməlidirlər ki, nəinki yerli sahibkarlar, hətta xarici investorlar da..."
"Dövlət öz siyasətini aparır və sahibkarlığın inkişafı prioritet istiqamətdir. Sahibkarlara bu günə qədər bir milyard manat məbləğində güzəştli kreditlər verilib. Ancaq hər bir rayonun rəhbər orqanları özləri çalışmalıdır, şərait yaratmalıdır, sahibkarları cəlb etməlidir və onların fəaliyyətinə buna görə qiymət veriləcək".
Bunu Azərbaycan Prezidenti İlham Əliyev Ağstafada "Karvan-L EKO" sənaye parkında inşası başa çatdırılan müəssisələrin və istixana kompleksinin açılışında müəssisənin işçiləri və rayon ictimaiyyətinin nümayəndələri ilə görüşündə söyləyib.
Dövlət başçısı bildirib ki, burada bir neçə müəssisə fəaliyyət göstərəcək: "Yüzlərlə, bəlkə də minlərlə yeni iş yeri yaradılacaq. Bu sənaye parkında son illər ərzində gördüyümüz işlər artıq əyani şəkildə özünü göstərir. Regionların inkişafı, sənaye potensialının gücləndirilməsi, yeni iş yerlərinin, ixrac potensialının yaradılması, kənd təsərrüfatının inkişafı - yəni bu sənaye parkında bizim siyasətimiz öz əksini tapıb. Bu sənaye parkının özəlliyi ondan ibarətdir ki, burada yerli biznes özü bu parkı yaradır. Sənaye parklarının yaradılması indi Azərbaycanda geniş vüsət alıb".
Ökə Prezidenti bundan əvvəl də sözügedən məsələ ilə bağlı çağırış edərək rayonlara investisiyanın cəlb edilməsinin vacibliyinə toxunub. Rayonların inkişafı təkcə dövlətin ayırdığı vəsaitlə mümkün deyil. İnkişafa nail olmaq üçün həm də sahibkarları sərmayə qoymağa həvəsləndirmək lazımdır. Bu baxımdan icra başçıları sözügedən işi təşkil edə bilsələr, bu nə kimi nəticə verə bilər? Məsələyə münasibət bildirən ekspert Zakir Əhmədovun sözlərinə görə, bu baş versə, bunun çoxşaxəli müsbət iqtisadi-sosial effekti olacaq: "Çoxşaxəli müsbət effekti ondan ibarətdir ki, qoyulan sərmayələr nəticəsində rayonlarda yeni iş yerləri açılacaq. Məşğulluğun səviyyəsi yüksələcək. İnsanların sosial vəziyyəti yaxşılaşacaq. Bunun nəticəsində rayonlardan paytaxta axın azalacaq. Belə ki, zaman-zaman iş tapmaqdan ötrü rayonlarda əmək qabiliyyətli işçi qüvvəsi ya paytaxta, ya da xarici ölkələrə getməli olurdu. Bu da, öz növbəsində, rayonların boşalması ilə yanaşı, həm də inkişafına mənfi təsir göstərirdi. Rayonlarda münasib investisiya mühiti olsa, əlbəttə, sahibkar çalışacaq sərmayə qoysun və bundan fayda götürsün. Digər tərəfdən bu, rayonların mərkəzdən dotasiya asılılığını aradan qaldıra bilər. Nəticədə rayon öz daxili imkanları hesabına özünü təmin edəcək. O üzdən bununla bağlı icra başçılarının üzərinə böyük iş düşür. Yəni işi elə təşkil etməlidirlər ki, nəinki yerli sahibkarlar, hətta xarici investorlar da rayonlara sərmayə qoymaqda maraqlı olsun". Vidadi ORDAHALLI
