Əli Əlirzayev: "Aparılan uğurlu iqtisadi siyasətin nəticəsidir ki, yerli tələbatı ödəyən məhsulların çoxu orada istehsal olunur"
Azərbaycanın sosial-iqtisadi inkişafı özəl sektorun - sahibkarlığın inkişafı ilə birbaşa bağlıdır. Ölkənin sosial-iqtisadi inkişafında özəl sektorun fəaliyyəti ildən-ilə güclənir. Bu istiqamət Naxçıvan MR-in iqtisadiyyatında da özünü aydın büruzə verir.
Orada yeyinti sənayesi, tikinti, sənaye və digər istehsal və xidmət sahələri fəaliyyət göstərir. Təsadüfi deyil ki, bu gün regionda fəaliyyət göstərən 450-yə yaxın müəssisədə 350 növdə məhsul istehsal olunur. Onu da qeyd edək ki, Naxçıvan MR-də 336 növdə məhsula olan tələbat tamamilə yerli istehsal hesabına ödənilir. Orada sahibkarlar üçün yerli hakimiyyət orqanları tərəfindən müntəzəm treninq, məşq və seminarlar keçirilir. Eyni zamanda sahibkarlıq üzrə zəruri olan bütün məşğələlərə maliyyə və hüquq təşkilatlarının rəhbərləri cəlb edilir, fəaliyyətə yeni başlayan sahibkarlara işlərini mövcud qanunvericilik çərçivəsində qurmaq üçün zəruri hüquqi tövsiyələr verilir. İldə bir dəfə keçirilən sahibkarların görüşündə iş adamlarının qayğıları, onları narahat edən məsələlər öyrənilir və ortaya çıxan problemlər operativ həll edilir. Naxçıvanda fəaliyyət göstərən sahibkarlıq müəssisələrində 80 min adam çalışır. Sahibkarlıq müəssisələri təkcə şəhərlərdə deyil, MR-in bütün ərazilərində, ən ucqar kəndlərdə də yaradılır.
Bütövlükdə 350 adda məhsulun istehsal olunması Naxçıvan MR-in iqtisadiyyatı üçün necə göstəricidir? Məsələyə münasibət bildirən iqtisadçı-alim Əli Əlirzayev buna müsbət prizmadan yanaşdı: "İstehsal nə qədər çox olsa, bu bir o qədər Naxçıvan iqtisadiyyatının inkişafına öz müsbət təsirini göstərəcək. Orada mineral sular emal olunur və daha sonra həm ölkə daxilində, həm də xaricdə satılır. Aparılan uğurlu iqtisadi siyasətin nəticəsidir ki, yerli tələbatı ödəyən məhsulların çoxu orada istehsal olunur. Nə qədər müxtəlif adda məhsul istehsal olunsa, bu bir o qədər yaxşıdır. Əsas odur ki, bu bazara çıxarılan məhsuldur, gəlir gətirir, orada ixtisaslaşır. Elə məhsullar var ki, Naxçıvan üçün iqtisadi baxımdan daha sərfəlidir. Həmin məhsulların istehsalının genişləndirilməsi daha çox gəlir gətirir. Bu həm də çoxsaylı iş yerinin açılması deməkdir. Məsələn, mərmər, kərpic, qum sənayesinin inkişaf etdirilməsi çox səmərəlidir. Bu və digər istiqamətdə çoxsaylı işlər görülüb. Ümumən müxtəlif adda məhsul istehsalı Naxçıvan iqtisadiyyatının daha da inkişafına xidmət edir". Vidadi ORDAHALLI
