Ruslan Atakişiyev: "Bütün bunlardan sonra yoxlamaların azaldılmasının praktikada konkret nəticələri daha çox özünü göstərəcək"
Sahibkarların yoxlanılması 1000 dəfə azalıb. 2016-cı ilin yanvar-sentyabr aylarında Azərbaycanda sahibkarlıq fəaliyyəti üzrə 50 yoxlama keçirilib. Halbuki, ötən ilin doqquz ayı ərzində bu göstərici 50 min təşkil edib.
Bunu jurnalistlərə açıqlamasında iqtisadiyyat naziri Şahin Mustafayev bildirib. Onun sözlərinə görə, Azərbaycan Prezidenti İlham Əliyev son vaxtlar yerli istehsalı dəstəkləmək, qeyri-neft ixracının təşviqi və sahibkarlığın inkişafı üçün çox mühüm addımlar atıb: "İlk növbədə qeyd etmək istəyirəm ki, aparılan iqtisadi islahatlar çərçivəsində sahibkarlıq fəaliyyətinin yoxlanılmasının 2 il dayandırılması, biznesin qurulması üçün lisenziyaların sayının azaldılması və çox mühüm addımlar atılıb".
Eyni zamanda, Ş.Mustafayev əlavə edib ki, yerli istehsalı dəstəkləmək üçün 84 malın idxalına spesifik gömrük rüsum dərəcələri tətbiq edilib.
O da məlumdur ki, ölkədə bazar münasibətlərinin formalaşdığı müasir dövrdə kiçik və orta sahibkarlıq bölməsinin yaradılması və inkişaf etdirilməsi cəmiyyətin sosial və iqtisadi yeniləşməsində çox mühüm rol oynayır. Dövlət kiçik və orta sahibkarlığı müdafiə etməklə orta sinfin formalaşması üçün imkan əldə etmiş olur. Bundan başqa, kiçik və orta biznesin fəaliyyət dairəsinin geniş olması büdcə vəsaitinin tamamlanmasının səmərəli formasıdır. Çünki bunlar yeni iş yerlərinin yaradılmasına, işsizlik səviyyəsinin aşağı düşməsinə, sosial gərginliyin aradan qaldırılmasına, ölkənin iqtisadi dayaqlarının möhkəmlənməsinə səbəb olur.
Bütün bu deyilənlərin fonunda, sahibkarların yoxlanılmasının 1000 dəfə azaldılması praktikada nə kimi konkret nəticələr verib? Məsələyə münasibət bildirən İqtisadi Resursların Öyrənilməsi Mərkəzinin rəhbəri Ruslan Atakişiyevin sözlərinə görə, bu yöndə görüləsi işlər çoxdur: "Biz tez-tez rayonlara gedirik, sahibkarlarla ünsiyyətdə oluruq. Məsələ ondadır ki, sahibkarlar bir sıra məsələlərlə bağlı öz fikirlərini bildirir. Onların sözlərinə görə, müvafiq qurumlar vergidən yayınan sahibkarlarla bağlı monitorinq keçirir. Monitorinqlər də işin qızğın vaxtında həyata keçirilir. Vergi yükünü hesablamaq üçün həmin vaxt gələn gəliri keçmiş dövrə vururlar. Ancaq yaxşı olardı ki, digər dövrlər də nəzərə alınsın. Bax, sahibkarların əsas tələblərindən biri məhz bununla bağlıdır. Başqa bir tərəfdən digər təklif ondan ibarətdir ki, sahibkarlıq subyektlərinin yoxlanılması yanaşmasına dəyişikliklər edilsin. Yəni sahibkarlıq subyektinin yeni yaranması, kiçik, orta və böyük olması nəzərə alınmalıdır. Həmçinin, iqtisadiyyatın pitperativ sahələrində fəaliyyət göstərməsi məsələləri nəzərə alınmalıdır. Bütün bunlardan sonra yoxlamaların azaldılmasının praktikada konkret nəticələri daha çox özünü göstərəcək". Vidadi ORDAHALLI
