Rəsul Cahangirli: "Bankların sayının azalması bu sahədə işləyənlərin sayına təsir edib"
Azərbaycanda maliyyə və sığorta sektorunda fəaliyyət göstərən müəssisə və təşkilatların sayı azalıb. Dövlət Statistika Komitəsindən verilən məlumata əsasən, 2016-cı il oktyabrın 1-nə onların sayı 1 545-ə enib. Maliyyə və sığorta fəaliyyəti ilə məşğul olan müəssisə və təşkilatların cəmi təsərrüfat subyeklərində xüsusi çəkisi 1,5 % təşkil edib.
Kommersiya təşkilatlarının sayında da azalma müşahidə edilib. Oktyabrın 1-nə onların sayı 1 513 ədədə enib.
İlin əvvəli ilə müqayisədə müəssisə və təşkilatların sayında 2,9 % azalma qeydə alınıb.
Bu ilin yanvar-sentyabr aylarında maliyyə və sığorta fəaliyyəti ilə məşğul olan 70 ədəd yeni müəssisə və təşkilat yaradılıb. 117 qurum isə ləğv edilib.
Bundan əvvəl də azalmanın olması qeyd olunmuşdu. Belə ki, bu ilin yanvar-iyul aylarında ölkə iqtisadiyyatının maliyyə və sığorta fəaliyyəti sahəsində muzdla çalışan işçilərin sayı 26,7 min nəfər, onların orta aylıq nominal əməkhaqqı 1 202,2 manat təşkil edib. Statistikaya əsasən, son 26 il ərzində maliyyə sahəsində muzdla çalışan işçilərin sayında ən aşağı göstərici isə 1998-ci ildə (5,4 min nənfər) qeydə alınıb. Bu göstərici 2005-ci ildə 18,1 min nəfər, 2010-cu ildə 24,4 min nəfər, 2011-də 26,3 min nəfər, 2012-ci ildə 26,9 min nəfər, 2013-cü ildə 30,6 min nəfər, 2014-cü ildə 32,8 min nəfər, 2015-ci ildə 33 min nəfər təşkil edib.
Ümumilikdə ekspertlər sözügedən azalmanı nə ilə əlaqələndirir? Məsələyə münasibət bildirən ekspert Rəsul Cahangirlinin sözlərinə görə, maliyyə sektorunda işləyənlərin sayının azalmasına təbii yanaşmaq lazımdır: "Məsələ ondadır ki, böhranla əlaqədar olaraq bir sıra banklar bağlanıb. Elə banklar da oldu ki, mövcud vəziyyətlə əlaqədar filialların sayını azaltdı. Bu da, istər-istəməz, bu sahədə işləyənlərin sayının azalmasına öz təsirini göstərir. Məlum devalvasiyadan sonra belə vəziyyətin yaranacağı gözlənilən idi. Çox güman ki, ilin sonuna qədər belə vəziyyət davam edəcək. Analoji proseslər sığorta sektorunda da özünü göstərir. Yəni deməyim odur ki, ümumi iqtisadiyyatda baş verən proseslər bir-birilə sıx bağlıdır. Bağlı olduğu üçün də bir sektorda baş verən hansısa durğunluq digər sektora öz təsirini göstərir. Məsələ ondadır ki, maliyyə sektorunda baş verənlər neftin dünya bazarında qiymətinin ucuzlaşması ilə əlaqədardır". Vidadi ORDAHALLI
