Rüfət Quliyev: "Azərbaycan adı ilə istehsal olunan mebel məhsullarının xaricə ixrac olunması ölkə iqtisadiyyatına müsbət təsir edəcək"
Məlum olduğu kimi, ölkə başçısı İlham Əliyev oktyarın 19-da Ağstafa rayonuna səfər edib. Prezident İ.Əliyev səfər çərçivəsində "Saloğlu" mebel istehsalı müəssisəsinin nəzdində yaradılmış "Modern" mebel fabrikinin açılışında iştirak edib. O öncə "Saloğlu" mebel fabrikinin məhsullarına baxıb, müəssisənin yeni layihələri ilə tanış olub. Daha sonra Prezident İlham Əliyev "Modern" mebel fabrikini işə salıb.
İ.Əliyevə, həmçinin, "Saloğlu" mebel istehsalı müəssisəsinin nəzdində yaradılacaq "Venzana" mebel fabriki barədə məlumat verilib. Bildirilib ki, bu mebel fabriki 4 istehsal sahəsindən ibarət olacaq. İstehsal ediləcək məhsulların daxili bazarla yanaşı, Almaniyaya, Belçikaya, Fransaya, Hollandiyaya, İtaliyaya, İspaniyaya və İsveçə ixracı nəzərdə tutulub.
Ölkədə istehsal olunan mebel məhsullarının xarici ölkələrə ixrac olunması bu sahənin daha da inkişaf etməsinə səbəb olacaq. Həmçinin, xarici bazarda Azərbaycan istehsalı olan mebel çeşidlərinə tələbat artacaq.
Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Rüfət Quliyev "Bakı-Xəbər"ə açıqlamasında qeyd etdi ki, Azərbaycan adı ilə istehsal olunan mebel məhsullarının xaricə ixrac olunması ölkə iqtisadiyyatına müsbət təsir edəcək.
Millət vəkili mebel sənayesini inkişaf etdirmək üçün bəzi nüansları qeyd etdi: "Mebel istehsalı sahəsində dünya səviyyəsində tanınmaq üçün xammal ehtiyatı hesab olunan tək yerli ağaclarla kifayətlənməməliyik, xaricdən də ağaclar gətizdirmək lazımdır. Mebel istehsalı üçün xüsusi ağaclar tələb olunur, əsasən qoz və şabalıd ağacı. Bu ağaclardan hazırlanan dəstlər ən bahalı mebellər sayılır. Həmçinin, onu da deyim ki, dünya bazarında mebel istehsalı üçün tələb olunan ağacların da qiyməti çox bahadır.
İlk olaraq öz materialımızdan istifadə edə bilərik. Öz materialımızla yanaşı, Yunanıstan və digər ölkələrdən də ağac gətizdirmək lazımdır. Belə ki, o ağaclar seleksiya yolu ilə yetişdirilir. Seleksiya yolu ilə yetişdirilən ağaclar
bar vermir, ancaq boy verir. Bu tip ağaclar əkiləndən 5 il sonra material kimi istifadə etmək olur. Seleksiya yolu ilə əkilən ağaclar sürətlə artır. Məsələn, 100 ağac kəsilsə, onun yerinə 4 qat həmin növ ağaclar əkmək olar və onlar sürətlə boy verəcək".
R.Quliyev hesab edir ki, Azərbaycan adı ilə istehsal olunan mebellərin xaricə ixracı ölkəyə valyuta gətirəcək: "Bu sahəyə diqqətin artırılması öncə daxili istehsalı artıracaq. Nəzərə almaq lazımdır ki, mebel istehsalı üçün tək ağac deyil, müxtəlif növ aksesuarlar tələb olunur. Məsələn, parça, şüşə və digər aksesuarlar. Belə olan halda, həmin aksesuarların hazırlanması əlavə iş və gəlir deməkdir".
Müsahibimiz onu da əlavə etdi ki, Azərbaycanın mebel sənayesində uğur əldə etməsi çətin olmayacaq. Çünki bu sahədən anlayışı olan kifayət qədər mütəxəssisimiz var: "Bəllidir ki, əvvəllər də azərbaycanlılar mebel sahəsi ilə məşğul olub. Bizim gözəl mebel dizaynerlərimiz var, onlar öz işinin mütəxəssisidir. Təcrübəli mebel ustalarımızın hazırladığı qeyri-adi mebel dəstlərinə əvvəllər və indinin özündə də tələb olub. Həmin ustaların əl işlərinə tək ölkə daxilindən deyil, xaricdən də sifarişlər olub".
Günel CƏLİLOVA
