Rəşad Həsənli: "SOCAR istiqrazlarının banka girov kimi qoyulub kredit götürülməsi qiymətli kağız bazarında aktivliyi inkişaf etdirər"
SOCAR istiqrazlarını girov qoyaraq banklardan kredit götürmək mümkün olacaq. Bunu "BFB-də likvidlik alətləri: REPO" işgüzar forumunda "SOCAR Capital" şirkətinin rəhbəri Elxan Həsənov bildirib.
O qeyd edib ki, SOCAR istiqrazı almış şəxsin təcili pula ehtiyacı olduqda onu satmaya bilər: "İstiqrazı banka girov qoyaraq kredit götürmək mümkündür. Bu zaman vaxt itkisinə də yol verilmir. Kredit götürənin araşdırılmasına ehtiyac yoxdur. Çünki ortada likvid SOCAR istiqrazları mövcuddur".
SOCAR istiqrazlarını banka girov qoyaraq kredit götürülməsinin nə kimi əhəmiyyətinin olacağını öyrənmək məqsədilə iqtisadçı-ekspert Rəşad Həsənliyə müraciət etdik.
O, "Bakı-Xəbər"ə açıqlamasında qeyd etdi ki, SOCAR-ın istiqrazları kifayət qədər likvidli istiqrazlar sayılır: "İstənilən bank, kredit öhdəliyi yerinə yetirilməzsə, o kredit götürən şəxs tərəfindən həmin istiqrazı nağdlaşdıra bilər. Bu istiqrazlar tədavülə buraxıldıqdan sonra qısa müddət ərzində kifayət qədər tələb formalaşdırıb. Hətta oktyabrın 19-u birjalarda istiqrazların satışı 10 faiz bahalaşıb. Bu isə o deməkdir ki, SOCAR istiqrazlarına maraq yüksəkdir. Eyni zamanda, onu də nəzərə almaq lazımdır ki, istiqrazlar tədavüldə olduğu müddət ərzində aktiv vəsait sayılır. Bu likvidlikdən banklar istifadə edərək istiqrazları girov götürə bilər".
İqtisadçı onu da əlavə etdi ki, insanlar vəsaitlərini 5 faizlə istiqrazlarda yerləşdirir, sonra isə bankdan 30 faizlə kredit ala biləcəyi maraq doğurur: "Amma, hər halda, müxtəlif düşüncəyə malik insanlar var. Onu da unutmaq lazım deyil ki, SOCAR istiqrazları dollarladır. İstiqraz sahibi 5 faiz dividend əldə edəcək. Devalvasiyadan sonra istiqrazların manatla ifadədə dəyəri yüksək olur. Eyni zamanda, bazarda istiqrazlara tələb artdıqca, onların qiymətində artım baş verəcəyi istisna olunmur. Bu isə istiqraz sahibi üçün əlavə gəlir mənbəyi ola bilər".
Həmsöhbətimizin fikrincə, insanlar öz vəsaitlərini istiqrazlarda saxlayaraq banklara müraciət edə bilər. Banklar tərəfindən girov tələb olunarsa, o zaman vətəndaş SOCAR istiqrazlarından girov kimi istifadə edə bilər.
R.Həsənli onu da əlavə etdi ki, SOCAR istiqrazlarının banka girov kimi qoyulub kredit götürülməsi qiymətli kağız bazarında aktivliyi inkişaf etdirər.
Günel CƏLİLOVA
